Alemannische Wikipedia

Schweizer Portal für Recherche im Internet

S Schwiizer Portal für d Röschersche im Internet (SPRINT) isch es umfassends Informations- und Lehrmittel für d Suechi im Internet. S git deet kommentierti Verzäichnis vo Suechmaschine, uusfüerlichi Grundlagetext über s Sueche vo Informatione im Allgemeine und über «Information Retrieval» im Spezielle.

SPRINT
Logo
Basisdate
Erschynigsjohr 1997
http://sprint.informationswissenschaft.ch/

Gschicht ändere

D Siite gits sit em Jänner 1997 und si isch sit dänn immer uuspout und erwiiteret worde.

Uf de Grundlag vo zwe Artikel über Suechverfaare, Suechmaschine und Katalög, wo 1996 i de Fachzitschrifte «Nachrichten für Dokumentation» und iX Magazin cho sind, häd de Bernard Bekavac a de Universität Konstanz im Jänner 1997 die erschte Siite über Suechmaschine gschribe. Damals hät das no «WWW-Suchseiten der Informationswissenschaft» ghäisse.[1]

S SPRINT wird regelmässig zäme mit Studänte vo de Imformationswüsseschaft erwiiteret. Zäme mit em Gründer isch s 2004 as Schwiizerische Institut für Informationswüssenschaft a de Hochschuel für Technik und Wirtschaft z Chur ggange. Im Jaar 2009 sind au Modul für s E-Learning und Schueligsunterlage für Dozänte dezuecho, 2011 d Rubrik Wüssenschaftlichi Suechi, und en Täil vo de Siite isch vo Studänte vo de Gämfer Hochschuel für Wirtschaft is Französische übersetzt worde.[2]

Inhalt ändere

Im Täil Allgemäini Suechi im Internet wird erchlärt, wien Suechmaschine funktioniered, was Operatore sind, weli Methode guet funktioniered und wie mer am beschte e Röschersche macht. Bim Stichwort Suechmaschine wärded uf ere lange Liischte ganz verschidnigi Programm vorgstellt.

Im Täil Wüsseschaftlichi Suechi im Internet gats drum, wien wüsseschaftlichi Suechmaschine funktioniere tüend. Für mänge Dienscht gits en usfüerliche Steckbrief. So chammer besser entschäide, weli Suechmaschine für wele Zwäck di besser isch. Es gaat da ano um anderi Quäle für wüsseschaftlichi Literaturrecherche im Internet.

S Portal büütet Links zu wichtige Biblioteeke und zu Website vo grosse Lexika und Wörterbüecher, und zwar au zu alte Wärch sid em 18. Jaarhundert, wo me hüt na nützlechi Informatione zu vil Sache cha finde.

Es hät didaktisch ufberäiteti Modul zum Sache sälber z lerne (E-Laerning). Mit Fallbiischpil und Quiz chan prüeft wärde, was mer glernt häd. Zum Schluss häds no Hintergrundinformatione rund um s Internet, en Bricht über di spannendi Gschicht vo de Open Source-Bewegig und aktuelli Studie. Für Dozänte und Lehrer us em Bildigsberiich gits ano Schueligsunterlage. Dadefür brucht mer aber es Passwort.

SPRINT isch hüt es Produkt vo de HTW Chur. Ali Kwäle sind gnau agee. Im umfangriiche Glossar cha mer sehr vil Begriff naaschlaa.[3]

SPRINT lauft uf TYPO3. Das isch e freii Software. D Inhalt vo SPRINT sind under ere benutzerfrüntliche Creative Commons-Lizenz.[4]

Kritik ändere

S Portal richtet sich a Studänte und Dozänte. Das isch e klari Zielgruppenorientierig. Drum sind d Text seer kompakt. Für anderi Lüüt isch s Portal drum zimli aaschpruchsvoll.[5] Dezue ane verwändet das Portal Illustratione eher sparsam.

Weblink ändere

Fuessnote ändere

  1. ↑ Willkommen zum neuen SPRINT. Chur: HTW, 2009. (=Foliensatz).
  2. ↑ Archivierte Kopie (Memento vom 22. Dezämber 2015 im Internet Archive) (29. Juli 2015).
  3. ↑ Archivierte Kopie (Memento vom 27. Juli 2015 im Internet Archive) (12. Februar 2011).
  4. ↑ Archivierte Kopie. Archiviert vom Original am 24. September 2013; abgruefen am 29. Juli 2015. (12. Februar 2011).
  5. ↑ Marketingkonzept SPRINT. Chur: HTW, 2009.
Vun "https://als.wikipedia.org/w/index.php?title=Schweizer_Portal_für_Recherche_im_Internet&oldid=928849"