Siegfried Lehmann
| Dialäkt: Undermarkgreflerisch |
Dr Siegfried Lehmann (* 24.Jänner 1955 z Lieberose) isch e dytsche Bolitiker (Bindnis 90/Di Griene). Syter anne 2006 isch er Abgordnete im Landdag vu Bade-Wirttebärg.
Uusbildig un Beruef ändere
Dr Siegfried Lehmann isch uf d Volks- un Hauptschuel z Radolfzell gange. No dr Schuel het er en Uusbildig zum Tächnische Zaichner bi dr Allweiler AG z Radolfzell gmacht. Noch em Zivildienscht 1976 bis 1977 z Singe het er vu 1977 bis 1980 Maschineböu an dr FH Konschtanz studiert. Zwai Johr lang het er as Sachverständige bim TÜV Baden gschafft, derno het er vu 1982 bis 1985 an dr Universitet Stuegert Fertigungstechnik uf Lehramt studiert. S Referändariat fir s Lehramt an berueflige Schuele het er 1985 bis 1987 gmacht. Syter anne 1987 isch er Lehrer fir Informationstächnik un Mathematik an dr Hontes-Gwärbeschuel z Singe. Syt 2000 isch er Studiediräkter un Fachberoter bim Oberschuelamt im Regierigsbresidium.
Bolitischi Laufbahn ändere
Dr Siegfried Lehmann isch e Grindigsmitglid vu dr Griene anne 1979 gsii un het dr grien Kraisverband Konschtanz mitufböue. Vu 1983 bis 1986 isch er Mitglid vum erwyterete Landesvorstand vu dr Griene Bade-Wirttebärg gsii. Syter anne 1989 isch er Vorsitzer vu dr Gmaidsrotsfraktion vu dr Freie Griene Lischt im Gmaindstot vu dr Stadt Radolfzell. Syt 1994 isch er Mitglid vum Kraisdag vum Landkrais Konschtanz. Im Johr 2004 isch er au Mitglid vu dr Verbandsversammlig vum Regionalverband Hochrhy-Bodesee wore.
Bi dr Landdagswahl z Bade-Wirttebärg am 26. Merz 2006 isch dr Lehmann iber s Zwaitmandat im Wahlkrais Konschtanz in dr Landdag vu Bade-Wirttebärg gwehlt wore. Bi dr Landtagswahl am 27. Merz 2011 het er mit 34,7 % vu dr Stimme s Diräktmandat im Wahlkrais gwunne. Är isch Sprächer vu syre Fraktion fir beruefligi Bildig, Wyterbildig, Juged un s blant atomar Ändlager im schwyzerische Benke. Syter 2011 isch er Vorsitzer vum Uusschuss fir Kultus, Juged un Sport, derzue ischer Mitglid im Europauusschuss.
Sunschtigs Engaschmänt ändere
- Mitglid im Ufsichtsrot vu dr Stadtwerke Radolfzell GmbH
- Zweete Vorsitzer vum Kunstverein Radolfzell
- Zweete Vorsitzer vu dr „Residenz Rettungsgesellschaft e. V.“ (Förderverein des Residenz-Kinos Radolfzell)
- Mitglid in dr Gewerkschaft Erziehung und Wissenschaft
- Mitglid im Bund für Umwelt und Naturschutz Deutschland (BUND)
- Mitglid im Naturschutzbund Deutschland (NABU)
- Mitglid im Allgemeinen Deutschen Fahrrad-Club (ADFC)
- Mitglid bi Pro Bahn
- Mitglid im Jazz-Club Singen
- Mitglid im Foto-Club Radolfzell
- Mitglid im Förderverein Heimatmuseum und Stadtgeschichte Radolfzell
- Mitglid im Förderverein Frauen- und Kinderschutzhaus Radolfzell
Weblink ändere
Commons: Siegfried Lehmann – Sammlig vo Multimediadateie