St. Antonius (Wildegg)
D Chile St. Antonius isch d Chile vo dr römisch-katolische Pfarrei Wildegg im Aargau. Si isch 1969 oben am Dorf Wildegg bout worde.
Gschicht ändere
Sid dr Reformazion wird die alti Pfarrchile, wo grad näbedra bim Dorf Mörike stoot, für die refermiert Gmeind pruucht. Au die alti Dorfchile isch im Middelalter em heilige Antonius gweit gsi. Die alti Glogge vo dere Chile het d Inschrift: «st.Antonni.ora.pronobis.anno.dom.m.cccc», was uf düütsch heisst: ”Sankt Antoni bitt für öis; im Johr 1400“. Es isch eini vo de eltischte Glogge vom Aargau.[1][2]
Die nöji katolischi Chile vo Wildegg het dr heilig Antonius vo Padua zum Schutzpatron. D Plään für die modärni Chile mid em ussergwöönleche Chupfermantel sind vom Zürcher Architekt Justus Dahinden. D Chilewei isch am 1. Novämber 1969 gsi. E grossi Orgele het d Chile erscht ane 2014 übercho.[3]
Wärt ändere
Die katolischi Pfarrchile St. Antonius gilt als guets Wärch vo dr modärne Schwiizer Architektur i dr Zyt nach em Zwöite Wältchrieg, si zelt zu Bouobjäkt mit nazionaler Bedütig, und si stoot im Infäntaar vo de schützenswärte Kulturgüeter vo dr Schwiiz.
Literatur ändere
- Max Baumgartner (u. a.): Zur Einweihung der St. Antonius-Kirche Wildegg 1. November 1969. Baden 1969.
Weblink ändere
Commons: St. Antonius (Wildegg) – Sammlig vo MultimediadateieFuessnoote ändere
- ↑ Eine der ältesten Aargauer Glocken, geweiht dem Heiligen Antonius – in der refomierten Kirche Möriken under Kirche Möriken / Legenden uf ref-kirchen-ag.ch
- ↑ Georges Rapp: Das Geläute der reformierten Kirche Möriken. 2006.
- ↑ Die neue Goll-Orgel in der katholischen Kirche St. Antonius Wildegg Fäschtschrift vom 15. Juni 2014 uf pfarrei-lenzburg.ch