S Stachelschützehuus

S Stachelschützehuus isch en ehemooligs Schiesslokaal für Armbrustschütze bim Petersblatz z Baasel. Es gältet as e Baasler Kulturguet, wo für d Regioon vo Bedütig isch.

S Stachelschützehuus
Dialäkt: Baaseldütsch
Usschnitt us dr Stadtaasicht vo Basel vom Matthäus Merian, 1642.[1] S Stachelschützehuus isch rächts an dr Stadtmuure näben em Petersblatz, wo mit Böim bepflanzt isch.
D Statue uf em Stachelschützebrunne uf em Petersblatz

Hüte isch dört s Institut für Mikrobiologii und Hügiene vo dr Uniwersidäät Baasel dehäi.

Gschicht ändere

S hütige Stachelschützehuus isch 1546 für d Gsellschaft vo de Armbrustschütze baut worde. Es isch grad an dr üssere Stadtmuure gstande am Schützemättlidurm - mä het em Durm au Stachelschützedurm gsäit - und het ursprünglig öbben e kwadratische Grundriss gha. Dr Schiessstand unde nooche isch offe gsi und oobe draa im erste Stock het s Rüüm ghaa für gsellschaftligi Aaläss. Noch em Stadtblaan vom Meriaan vo 1642 isch mä vom Petersblatz us über e Stääge zum Huus uufe choo oder vom Brunne im süüdlige Egge vom Blatz über e Rampe. D Schütze häi dr Muure nooch gege Nord-Nordoste gschosse, won es Hüüsli gstanden isch mit de Ziilschiibe.

1707 häi d Stachelschütze e Flüügel gege Norde dra aabaut und 1729 het d Uniwersidäät dr Süüdflüügel draabaut wo dr Benedikt Staehelin si Labor gha het. Dört isch denn au im Daniel Bernoulli (1700-82) si füsikalischs Kabinett gsi, won er sini Experimänt gmacht het. 1790 häi sich d Stachelschütze s ganze Geböid under e Naagel grisse. 1856 het sich d Gsellschaft ufglööst, und s Bardeer isch denn en offeni Durnhalle worde. Mä het s Bardeer denn zuegmuurt und 1870 bis 1884 Klasserüüm für d Mäitli vo dr Oobere Döchderschuel dri doo.

1893 isch dr Kantonschemiker im Bardeer gsi und im Joor druf isch die Hügienischi Aastalt, wo erst grad gründet worden isch, im erste Stock iizooge. 1987 het mä s Huus innenooche afo renoviere, so dass es de Aasprüch vom ene modärne Forschigsinstidut entsproche het. 1990 isch s iigweit worde.

Vo usenooch gseet s Geböid öbbe immer no us wien e Fachwärkhuus us em 16. Joorhundert.

Kwelle ändere

Fuessnoote ändere

  1.  
    Uf dr Aasicht vom Merian vo 1642 gseet mä s Stachelschützehuus uf dr rächte Site vom Bild an dr Stadtmuure näben em Petersblatz, wo mit Böim bepflanzt isch.

Koordinate: 47° 33′ 31″ N, 7° 34′ 56,2″ O; CH1903: 610812 / 267553