Hauptmenü ufmache

De Strauhoof isch es Uusstelligshuus i dr Stadt Züri.

Inhaltsverzeichnis

GschichtBearbeite

Das Instituut isch imene alte stedtische Bürgerhuus, wo öpen im 16. Jaarhundert bout worden isch und vo alters här ”Strauhoof“ heisst. Das Huus isch i dr Barockzyt ane 1772 umgstaltet worde. Es stoot a dr Adrässe Auguschtynergass 9 zmitz i dr Altstadt vo Züri, am linggen Ufer vo dr Limet, i däm verwinklete Stadtdäil zwüschet de chrischtkatholische Augistinerchile und am Sankt Peeter.

Öpen i de 1950er Jaare hät d Stadt Züri agfange i dem Huus kultureli Aaläss durezfüere. Ane 1989 hät si’s umpout und vo dän aa als Oort für Uusstelige pruucht. Mid de Zyyt sind das mee und mee Uusstelige zu de Literatur woorde, wo de Berych ”Literatur“ vo de stedtische Presidiaalabtäilig gmacht hät. So hät de Strauhof d Posizioon von ere Aart Museum für Literaturgschicht ygnaa. Dem Betriib ghört aber ekäi äigeti Samlig vo kulturelem Material – weder Objäkt na Dokumänt –, und da demit entspricht das Huus nid eme würkleche Museum. Es hät aber de Name trozdem aagna zum im kulturele und im politischen Umfäld als Instituzioon besser gsee z weerde.

Öpe sid 2013 isch s Huus ine schwiregi Laag cho, wo mä z Züri d Förderig vo de Literatur nöi hät wele organisiere. Em Strauhoof wèèr d Role als Literaturmuseum verloore ggange, und me hèt’s wele für anderi Zwek pruuche; das wèèr s «Junge Literaturlabor JULL» gsii, wo’s de Schuelchind ermöglichet, diräkt mid Schriftsteller z rede.[1] Wil das e zimli e grosse kulturelle Verluscht gsi wèèr – de Strauhoof isch ja, wie syni Lüüt betoonet, s äinzig spezialisierte Literaturmuseum vo dr ganze Schwiiz – isch dän e starchi öfentlechi Diskussion da dezue entstande, und dän hät d Stadt doch pschlosse, de Strauhoof chön es Huus für Litraturuustelige blybe. Imene Weppeweerb sind Vorschleeg gsuecht woorde, wie me das in Zuekumpft chönt organisiere. En Jury, wo d Publizischtin Klara Obermüller gläitet hät, hät d Ideeè prüeft, und d Stadt hät ane 2015 de Betriib em «Veräin Literaturmuseum Züri» übergèè. Im Juli 2017 hät de Stadtraat vo Züri gsee, ass di erschti drüüjäärig Probezyt vom neue Strauhoofbetriib guet glooffe sig, und er hät em Gmäindraat vorgschlage, die Lösig wyter z finanziere und em Veräin Literaturmuseum Züri sogar na chly mee Gäld z ggèè.[2] Das hät dänn de Gmäindraat a de Sitzig vom 28. Nofämber 2017 au so pschlosse, und drum chan de Strauhoof bis ane 2022 mit sym Programm mit Projäkt zu gschichtleche und gselschaftleche Fraage rund um d Literatur wytermache.[3] Bi de Uusstelige, Verastaltige, Inszenierige und de anderne Aagebot gaat’s em drum, s Wüsse über d Literatur wyterzgèè und bi de Lüüt s Inträsse a de Literatur z ferstèèrche.

Wämme d Programm vom Strauhoof i de letsche Jaar aalueget, so gseet’s so uus, wie wänn d Mundartliteratuur daa ender sälte zum Zug chèèm.

Lueg auBearbeite

WeblinkBearbeite

FuessnooteBearbeite

  1. S Junge Literaturlabor JULL hät denn ane 2015 im ehemalige Museum a de Bäregass chöne de Betriib ufnèè.
  2. Stadtrat Zürich: Nach erfolgreicher Pilotphase: Literaturmuseum Strauhof soll mehr Geld erhalten uf limmattalerzeitung.ch, 5. Juli 2017
  3. Strauhof: Medienmitteilung: Strauhof wird fortgeführt uf strauhof.ch, 29. Nofämber 2017