Uerdinger Linie oder au ik-ich-Linie wird in dr Sprochwisseschaft d Isoglosse gnännt, wu verschobene k im Uuslut vum uuverschobene k drännt. In dr Dialäkt nerdlig vu däre Linie sait mer ik, sidlig sait mer ich. D Uerdinger Linie isch näbe dr Benrather Linie (maken/machen-Linie) aini vu dr wichtigeschte Abgränzige vu dr niiderdytsche zue dr mitteldytsche Dialäkt. Si isch aini vu dr nerdligschte Linie vu dr Zwoote Lutverschiebig un dodermit zwische Niiderdytsch un Hoochdytsch.

D Uerdinger un d Karlsruher Linie

Des Dialäktbiet im Weschte zwische dr Benrather Linie im Side un dr Uerdinger Linie im Norde nännt mer Siidniiderfränkisch (Limburgisch), d Dialäkt nerdlig vum Siidniiderfränkisch ghere derno zum Niidersächsisch, siidlig dervu zum Ripuarisch. Des Siidniiderfränkisch isch e Ibergangsberyych zwisch dr niiderdytsche un dr mitteldytsche Dialäkt.

Gnännt isch d Uerdinger Linie noch em Krefelder Stadtdail Uerdingen, wu si iber dr Ryy goht.

VerlaufBearbeite

D Uerdinger Linie fangt aa bim belgische Leuven (Löwen) un chunnt iber s niiderländisch Roermond un Venlo uf Viersen z Dytschland, goht zwische Krefeld-Uerdingen un Duisburg-Mündelheim iber dr Ryy, verlauft nerdlig vu Mintard an dr Ruhr, dur Bergisch Land un drifft bi Wuppertal uf d Benrather Linie. Ab do verlauft si im Große un Ganze idäntisch mit dr Benrather Linie un wycht nume an wenige Stelle vu sällere ab. Erscht z Brandeburg drännt si sich dailwyys vu dr Benrather Linie, wel si dr Boge vu däre um d Stadt Berlin nit mitmacht, dert sait mer „ick mache“. Wyter eschtlig verlaufe die boode Linie aber wider zämme.