Dr Urbanbrunne
Dr Urbanbrunne isch e middelalterlige Brunne am Bluemerain näben em Huus Nummere 24 in dr Baasler Altstadt. Dr Brunne stoot sit 1915 under Dänggmolschutz.[1]
.JPG)
| Dialäkt: Baseldütsch |
.JPG)
Gschicht
ändereDr Brunne isch 1448 bim Huus "zum Lauffeburg" baut worde und het dr Naame vom Häilige Urban überchoo. Weele Urban gmäint isch, wäiss mä nid. Am Aafang vom 16. Joorhundert het mä d Statue zum erste Mol usgwäggslet.[1] Dr hütig Brunnedroog isch us em Joor 1874, wo dr alt achteggig Staidroog het müesse usgwäggslet warde, und d Statue vom Urban oobe uf em Brunnestock isch e Kopii vo 1911. S Originaal isch im Historische Museum. Wo mä 1938 im Bluemerain Ornig gmacht het, het mä dr Brunne e chli verschoobe.[2] 1953 isch dr Urban mit ere Kopii vom Carl Gutknecht usgwäggslet worde.[1]
Dr Urban
ändereDr Urban isch dr Schutzpatron vo de Winzer und z Baasel vo dr Zumft zu Rääblüt. Au hüte no häi si e Statue von em in iirer Stuube. D Wiilüt häi sit 1500 e Daarstellig vom Urban uf iirem Banner. Bis um 1830 häi d Lüt jeedes Joor am 25. Mai, das isch dr Urbansdaag, d Tiara vom Häilige mit Blueme gschmüggt und iim e veieletti Stola aazooge. Mä het no Ärm an d Statue aagmacht, so dass er zwäi Gleeser Wii het chönne heebe, äins mit Rootwii in dr rächte, und äins mit Wisswii in dr lingge Hand. 1952 häi d Zümft zu Wiilüt und zu Rääblüt dä Bruuch widerbeläbt. Sithäär schmücke d Zumftbrüeder dr Urban wider an sim Naamensdaag, mache aber käini Ärm me draa.[2]
Weblingg
ändere- Zwei Seiten derselben Gespenstergeschichte? uf baselinsider. ch
Fuessnoote
ändere- ↑ 1,0 1,1 1,2 St. Urbans-Brunnen uf brunnenfuehrer.ch
- ↑ 2,0 2,1 Der Urbansbrunnen uf altbasel.ch
Koordinate: 47° 33′ 40″ N, 7° 35′ 13″ O; CH1903: 611162 / 267828