D Uriella, aigetli Erika Hedwig Bertschinger-Eicke (* 20. Februar 1929 z Züri; † 24. Februar 2019[1]), isch d Grinderi un s Oberhaupt vu dr der neireligiese Bewegig «Fiat Lux» gsii. Si het si as Sprochrohr vum Jesus gsääne, ihri Aahänger hän ere magischi Chreft zuegsproche un si as Wunderhaileri aagluegt.

Lääbe ändere

D Uriella het scho frie Kontakt zue dr Gaischtige Loge Züri un zue „Säkte“ z Großbritannie un in dr USA ghaa. Noch eme Rytuufall anne 1973, wu si schwäri Chopfverletzige dervu kriegt het, het si verchindet, ass si hällsää chennt. An dr Wynäächte 1975 heb si im «Liechtzäntrum Bethanie» in dr Schwyz in ere Trance e erschti Offebarig empfange.

Wu ihre erschte Mann gestorbe isch, het si z Egg ZH e Hailigdum as Mittelpunkt vu ihre Aahänger grindet, wu si dert versammlet hän. Do isch si zum erschte Mol as «Uriella» in Gottesdienscht ufdrätte. Si het si as diräkt Sprochrohr vum Jesus Chrischtus gsääne un het ihri Offebarige wytergee. Dr Ärzängel Uriel sei ere vyl Mol im Wohnzimmer erschine. D Grindig vu Fiat Lux isch am 12. Jänner 1980 gsii, no dr Uffassig vu dr Mitglider dur dr Jesus Chrischtus iber sy Sprochrohr Uriella in sym Hailigdum z Egg. In dr Zwischezyt isch des Hailigdum as Uusgangs- un Zäntralpunkt vu dr Brewegig uf Ibach bi Lindau im Schwarzwald verlait wore.

D Lehr vu Fiat Lux goht zrug uf d Offebarige vu dr Uriella, wu si vum Jesus oder dr Maria iberchuu heb un in dr Ich-Form vordrait het. D Verchindige hän e diefere Yyblick in d Blään vu Gott welle vermittle un zur Umchehr vor em Wältänd welle aalaite. D Lehr bstoht us ere Mischig vu Reinkarnationslehr, Karmadänke, Farbelehr, spiritistische Quälle, alternativer Medizin, ekologische Idee, em Rychtsflugschybemythos un mee. S Änd vu dr Wält sei noch, aber d Aahänger vu Fiat Lux dieje vu uubemannte Ruumschiff grettet wäre.

Fiat-Lux-Aahänger zien wyssi Sache aa, wel die Farb dr Strahl vum Luzifer («Schamanah») abwehre diei.

Weblink ändere

Fueßnote ändere

  1. Sira Huwiler: Uriella ist tot: Sektenführerin aus Ibach stirbt im Alter von 90 Jahren. In: Südkurier. 25. Februar 2019, abgruefen am 25. Februar 2019.
  Dä Artikel basiert uff ere fräie Übersetzig vu dere Version vum Artikel „Uriella“ vu de dütsche Wikipedia. E Liste vu de Autore un Versione isch do z finde.