Vallée des Ponts
S Vallée des Ponts oder au Vallée de la Sagne isch es Bärgtal im Nöieburger Jura.
Geografy ändere
S Taal foot südlech vo Schodfoo und em Pass Vue des Alpes a und goot uf La Sagne, Les Ponts-de-Martel und Brot-Plamboz. Es isch öppe 18 Kilometer lang und lyt uf der Höchi vo tuusig Meter über Meer. Es isch es höchs Taal zwüsche de beide Bärgchettine vom Mont Racine und vom Grand Som Martel. Das sind Jurabärge us Chalchschtei, und s Taal, wo am Afang vil töifer gsi isch, isch mit tike Sedimänt und Material vo Gletschermoräne usgfüllt. Drüber isch e starchi Schicht vo Moor und Riet gsi, wo dervo s Piet Bois des Lattes no hüt es schöns Hochmoor isch, und au der Marais de Brot isch e wyti fiöchti Landschaft. Früener het me im Taal wäred Joorhunderte i riisiger Mängi Turbe gstoche. Die Flechine, wo s hüt no git, sind under Naturschutz und wärde vo der Pro Natura Nöieburg pflägt.
S Wort “ponts” bedüütet i däm Gebiet Prügelwääg, wil me d Fuesswääg früener über das wyte fiöchte Riet mit Holzträmel gmacht het.
I der Middi vom Taal lauft der Bärgbach Bied uf Les Ponts-de-Martel, won er im vercharschtete Chalchbode in ere Dolyne verschwindet; erscht vier Kilometer wyter äne chunt er im Val-de-Travers bin ere Kwelle über em Fluss Areuse wider zum Boden use.
Vercheer und Turismus ändere
Durs Taal goot der Lengi noo d Strooss vo Schodfoo is Val-de-Travers, und kweer derzue d Kantonsstrooss vo Nöieburg uf Le Locle. Vo Les Ponts-de-Martel uf Schodfoo het’s sid 1889 en Ysebaan.
Im Winter isch das Piet e guete Platz zum go Langlaufe.
Koordinate: 47° 1′ 26″ N, 6° 47′ 20″ O; CH1903: 550604 / 208309