Wikipedia:Was d Wikipedia nit isch

(Witergleitet vun Wikipedia:WWNI)

D Wikipedia isch e Projäkt zum Ufböu vun ere Enzyklopedii un cha wäge däm nit s Forum syy fir bstimmti anderi Sache. Do sin Pinkt ufgfiert, wu mänkmol falsch gmacht oder falsch verstande wäre.

1. D Wikipedia isch kei Werterbuch. In ere Enzyklopedii soll Wisse vermittlet un Begriff un Idee dargstellt un keini Werter erklärt wäre, wie s im Werterbuech gmacht wird. Fir des git s ei eigene Namenruum: s Alemannisch Wiktionary.

2. D Wikipedia isch nit fir Theoriifindig do, sundere fir d Darstellig vu Theorie. In Artikel solle keini neje Theorie, Modäll, Konzäpt oder Methode ufgstellt wäre un au keini neje Begriff etabliert. Au Uussage, wu nit iberpriefbar sin, sin nit gwinscht. Ziil vu dr Wikipedia as Enzyklopedii isch d Zämmestellig vu bekanntem Wisse. Bi Theme us dr Alemannische Region, wu s kei vereffentligt Wisse driber git, cha vu dem Grundsatz abgwiche wäre. Bi sonige Artikel cha Wisse, wu nume lokal tradiert wird, yyfliesse un in änge Gränze au eigeni Forschige.

3. D Wikipedia isch kei Wärbe- oder Propagandaplattforum un kei Chuchi fir Grücht. Artikel solle neutral gschribe syy. Kontroversi Behauptige solle klar dokumäntiert syy.

4. Wikipedia isch kei Ort fir Essays oder Fan-Syte vu realen oder fiktive Idol. Artikel solle neutral, sachlig, objektiv un in eme enzyklopedische Stil gschribe syy. D Widergab vu Handligsverlaif (Literatur, Film, Computerspil) sott sachlig zämmegfasst syy. Spoilerwarnige sin grundsätzlig nit gwinscht.

5. D Wikipedia isch kei allgmeins Diskussionsforum un kei Chat-Ruum. Artikeldiskussionssyte sin derzue do Artikel z verbessere un nit derzue Debatte iber s Thema vum Artikel z fiere.

6. D Wikipedia isch kei Webspace-Provider un kei Ersatz fir e eigeni Websyte. Benutzersyte vu dr Wikipedianer sin fir Aarbet an dr Enzyklopedii do. D Wikipedia isch kei Forum fir e Sälbschtinszenierig, fir d Vereffentlichung vu literarische Tekscht, eigene Theorie, Blogbyträg oder Monolog ohni Bezug zue dr Wikipedia.

7. D Wikipedia isch kei Sammlig vu große Mängene vu strukturierte Raudate wie Delifonbiecher, Bibliografie, Linkverzeichnis, Adrässverzeichnis usw.

8. D Wikipedia isch kei Sammlig vu Quälle. Historischi Dokumänt, Brief, Interviews, Zitat, Märli, Lieder, Gsetzestekscht sotte nume as Bstandteil vun eme Artikel ufgnuu wäre. Fir freji Tekscht un Zitat git s eigeni Namenryym: s Alemannisch Wikisource un s Alemannisch Wikiquote.

9. D Wikipedia isch kei allgmeins Persone-, Vereins-, Organisatione- oder Firmeverzeichnis. Nume fir Persone un Inschtitutione, wu fir di Alemannisch Wikipedia relevant sin, sotte Artikel aagleit wäre. Bi Artikel iber Inschtitutione, Unternämme oder Gsellschafte sin d Aagab vu dr Poschtaaschrift, Delifonnummere, E-Mail-Adrässe oder Aasprächpartner nit gwinscht, au kei Aafahrtsbschrybige un Effnigszyte (Uhrzyte). Fir des git s e Link zue dr Internetpräsenz.

10. D Wikipedia isch kei Linksammlig. Exzessivi Linklischte oder Weblink im Artikeltekscht sin nit gwinscht. Fir des het s Linkverzeichnis im Internet, wie z. B. s Open Directory Project.

11. D Wikipedia isch kei Nochrichteportal oder Veraastaltigskalender un dient nit zuen ere aktuälle Berichterstattig. Fir des git s e eigene Namensruum: s Alemannisch Wikinews.

12. D Wikipedia isch kei Aaleitig un kei Rotgäber. S ghert nit zue dr Ufgabe vu dr Wikipedia z erkläre, wie mer e Gerät oder e Software brucht. D Wikipedia isch au kei Sammlig vu Chochrezäpt. Fir des git s e eigene Namensruum: s Alemannisch Wikibooks.