Wikipedia:Musterartikel noch Tielekt

Uf dere Siite Musterartikel noch Tielekt söll e Konzept uusgschaffet were, wie Artikel speziell uuszaichnet were chönd as e Biispil vomene guete Artikel imene alemannische Tielekt. Im Gegesatz zu de Bsunders glungene Artikle söll bi dene Tegscht in erster Linie d Sprooch und erst in zwooter Lini de Inhalt de Uusschlaag gee, weli Artikel uuszaichned wered.

E gwössi Vorarbet het de Badener jo scho mit de Siite Portal:Mundarte glaistet.

Hindergründ

De Weg vomene SMS I ha di soo gäärn! bis zomene enzyklopädische Artikel isch lang. Vili Lüüt sind nöd gwoned imene alemannische Tielekt wösseschaftlichi Tegscht z schriibe. Drum chas vo Vortail sii, wenn si en Uuswaal vo Artikle hend, wo i verschidnige Tielekt gschrebe wore sind und au i verschidnige Orthographie, wie Orthal för s Elsassische oder d Dieth-Schriibig för s Schwyzertütsche.

Früener sind d Kategorie im Tielekt XYZ e gaignets Mittel gsii, Artikel imene bistimmte Tielekt z finde. Hüt isch da numeno bidingt mögli, us verschidnige Gründ:

• Erstens werd d Tielektvorlaag i de Regle numeno för Artikel miteme enge lokaale Bizuug iigsetzt (Bischluss vom Summertreffe 2007).
• En andere wichtige Grund isch de, as z.B. d Kategori:Artikel uff Elsässisch mee as 1800 Artikel het, di maiste bistönd aber us wenige Sätz und tauged drum wenig, as en Aschauigsbisspil.

Bidingige för e Waal

• En Artikel söll aihaitlich im Tielekt sii. Da haisst nöd, as er nume vo aim Autor verfasst wore sii mue, er cha au, wie d Artikel Züri oder Berner Oberland vo aim Autoor wo mit em haimische Tielekt guet vertraut isch, völlig sproochlich veraihaitlicht wore sii.
• En Artikel söll ainigermasse stabi sii. De Artikel Züri isch drum nöd gaignet, do a dem Artikel immer wider und wider verschidnigsti Autoore mit vreschidnige Tielekt (und Orthographie) draa schaffet, wa natüürli erwünscht isch.
• Nöd gaignet sind Liste und fast nume Liste (z.B. Autoroute A 35), Jooresartikel (z.B. 0er), Artikel mit "astöössigem" oder umstrittnigem Inhalt.
• D Mindestgrössi söll bi öppe 3000 Zaiche lige - oni Literatur, Infoboxe und dergliiche. Die Grenze cha bi Tielekt mit wenig Artikle geg abe gsetzt were.
• Bi de Uuswaal söll druf gluegt were, as innerhalb vomene Tielekt meriri Autoore birücksichtigt were, aso nöd mee as drai Artikel vom al-Qamar, nöde mee as drai vom Holder nöd mee as drai vom Andi d etc.
• Bi de Uuswaal söll o druf gluegt were, ass möglichst vill Themepiet vorchömed. S Ziil söll jo sii, as zaigt werd, as au Artikel öber Kultur, Technik, Sprooch, Musig, Wösseschaft, Gsellschaft, Plitik etc. uf alemanisch gschrebe were chönnt.
• Kai Bidingig aber sicher interessant wäär, wenn zom Artikel gad ono en Audiodatai aazlosen isch.

Uuswaal

Jede, wo find, as en Artikel gaignet isch, chan e Vorschlag mache. Im Gegesatz zo de Bsunders glungne Artikle chönd durchuus au aigni Artikel vorgschlage were. Me as drai pro Autor sölls jo nöd gee. D Artikel wered denn demokratisch gwäält.

Vorschläg

Obacht! Da isch nume e Biispil, wie e Vorschlaag uusgsue chönnt:

• Ostschwizer Tielekt - Tielekt: Undertoggeborg - Hoptautor: al-Qamar - Bigründig: en abgschlossne Artikel, wo vill uufgrueffe werd und sproochlich aihaitlich isch. - Bimerkig: ...
• etc.