İnce Burun
İnce Burun oder Kávo Avlaka (Κάβο Αύλακα) isch e Vorpirg uf de törggische Insle Imbros und de westlichst Punkt vo de Törggai (25° 38 '59). Da Vorpirg litt westlich vom Dorf Uğurlu. Am süüdöstliche End vom Vorpirg litt d Bucht Gizli Liman / Liménas (Λιμένας), wo as Hafe för chliini Schiff und Jachte guet isch. Vo doo uss goot e lange Sandstrand bis zom chliine Fischerhafe vo Uğurlu.
De antiiki Sophist Flavius Philostratos vo Lemnos hett gschribe, ass s Vorpirg Naulochos (ἀκρωτήριον Ναύλοχος) uf de Insle Imbros wiene uusgstreckte Riis doligi. Bi dem Kap söll e Quele sii, wo männlichi Tier, wenn si druus trinkid, zo Eunuche macht, wiiblichi Tier aber ase biruuschi, ass si uf de Stell iischlooffid.[1] Wege de Äänlichkait vo de Näme werd aagnoo, as de moderni Name Avlaka de antiiki Name fortsetz tüeg. Allerdings werd o erwoge, ass s Vorpirg vo Pirgoz im Süüde vo de Insle s Kap Naulochos gsii sai. Aber o s Kap Kefaloz im Süüdoste vo Imbros chunnt guet i Froog.[2]
Anzelnoowiis ändere
- ↑ Philostratos: Heroicus 289
- ↑ Bärbel Ruhl: Imbros. Archäologie einer nordostägäischen Insel (= Marburger Beiträge zur Archäologie Bd. 5). Marburg 2019, ISBN 978-3-8185-0536-3, S. 95
Weblink ändere
- The Most Extreme Points Of Turkey WorldAtlas.com