Adalbero von Augsburg
Dr Adalbero († 28. April 909 z Augschbrg) isch e Bischof vom Bischtum Augschbrg gsi.
Me dänkt, er sig us der Familie vo de Grafe vo Dillinga cho, sis Geburtsdatum isch nid bekannt. Er het als ussergwönlech begabte Maa gulte und het i dr Wüsseschaft und bsunders i dr Musig vil chönne. Er isch nach sinere Usbildig, won er vilecht im ene alemannische Chlooschter überchoo het, anne 887 Bischof vo Augschbrg worde. Er het sech guet mit em König Arnulf vrstande, und er isch mit däm anne 895 uf Rom ggange, wo dr Arnulf zum Kaiser gchrönt worden isch.
Ane 895 isch dr Adalbero vom König als Vorsteher vom Chlooschter Lorsch ygsetzt worde, zum dä Konvänt, wo dozmol schynts nid alls guet gsi isch, wider zu dr rächte Ornig z bringe.
Dr König Arnulf het dr Adalbero als Lehrer für sin Soon Ludwig zue sech gruefe. Wo dr Kaiser anne 899 gstorben isch, isch dr Ludwig erscht föif Joor alt gsi. Do isch d Regierig vom oschtfränkische Rych meischtens bi de mächtige Bischöf wie öppen em Salomo vo Konschtanz gläge, und au dr Adalbero het im Rych vil z säge gha.
Churz nochdäm dr Bischof Adalbero anne 909 gstorben isch, isch au em junge König Ludig sis Läbe scho z Änd gange.
Literatur ändere
- Placidus Braun: Geschichte der Bischöfe von Augsburg. Chronologisch und diplomatisch verfaßt und mit historischen Bemerkungen beleuchtet. Augsburg 1813/15, Bd. 1, S. 151 f.