Alternativi Fakte

Alternativi Fakte si bsundrigs unschenierti Luuge, vor allem wenn si vo Politker öffentlig verbräitet warde. Dr Begriff isch vo dr Berootere vom amerikanische Bresidänt Donald Trump, dr Kellyanne Conway, brucht worde. In ere politische Talksändig im amerikanische Färnsee het me si gfrogt, wie si d Behauptig vom Brässsprächer vom Wisse Huus, em Sean Spicer, wurd erklääre, ass mee Lüt an d Inaugurazioonzeremonii vom Donald Trump z Washington, D.C. cho sige as zur Amtsiifüerig vo sim Vorgänger Barack Obama. As äine vo de Bewiis, ass das glooge sig, het mä im Färnsee Luftufnaame vo de bäide Zeremonie zäigt, wo alli häi chönne gsee, ass bim Obama mee Lüt si cho d Fiir bschaue as bim Trump.

E Demo für d Wüsseschaft und gäge alternativi Fakte z Stuegert im April 2017, noch em Uftritt vo dr Kellyanne Conway.

Was d Conway gsäit het, isch denn immer wider mit de Manipulazioonstechnike im dystopische Roman 1984 vom Orwell vergliche worde, bsundrigs mit de Begriff Nöisprech und em Dobbeldänke, wo din vorchömme. Wo dä Bezuug s Publikum erräicht het, si uf äi Chlapf seer vil mee Exemplaar vo däm Roman verchauft worde.

Noch em Duden si Fake News Falschnoochrichte, wo in de Medie und im Internet, bsundrigs in de Social Media verbräitet wärde, zum d Mäinig vom Publikum z manipuliere, wääred es sich noch em Joel Pollack uf Breitbart News bi Alternative Fakte um Ussaage wurd handle, wo harmlos und genau sige und vor Gricht döffti brucht wärde, zum en Aaklagte z verdäidige.