Amalafrid

Dr Amalafrid, wo öppen am Afang vom sächste Joorhundert uf d Wält cho und anne 552 gstorben isch, isch e Prinz vom Volch vo de Tüüringer gsi.

Si Vatter isch dr tüüringisch König Herminfrid gsi, und syni Muetter d Amalaberga. Syni Schwöschter, wo me dr Name vonnere nit könnt, isch d Frau vom Langobardekönig Audoin gsi.

Anne 531 isch s mit em Königrych vo de Tüüringer umme gsi. Do isch dr Amalafrid zu den Oschtgoote uf Ravenna is Exil. Wo die oschtrömischi Armee under am Gäneraal Belisar em Oschtgooterych es Ändi gmacht het, isch dr Amalfrid uf Konstantinopel choo. Döört het er im oschtrömische Militäär Karriere gmacht und isch sogar sälber e Heermeischter worde. Er isch mit ere oschtrömische Kampfgruppe em Langobardekönig Audoin im Chrieg gäge d Gepiide go hälfe; bi dene Kämpf isch er de ums Lääbe cho.

wohär me das weiss

Vom Amalafrid brichte d Büecher vo de Gschichtschryber:

• Prokop
• Venantius Fortunatus