Animazioon

Animazioon (vo lat. animare, „zum Lääbe erwecke“; animus, „Gäist, Seel“) isch im ängere Sinn jedi Technik, wo mä Äinzelbilder in schnäller Folg eme Zueschauer zäigt, so dass dä e bewegts Bild gseet. D Äinzelbilder chönne zäichnet, vom e Compiuter berächnet oder fotografischi Ufnaame si. Wenn e sonigi Sekwänz mit 24 Bilder oder mee bro Sekunde vorgfüert wird, entstoot bim Zueschauer d Illusion von ere flüssige Beweegig. E 90 Minute lange Film bestoot us öbbe 129'600 Äinzelbilder und dr Ufwand für zum son e Film mache isch hooch.

D Compiuteranimazioon vom ene Würfel, wo sich dräit

D Fotiserii Horse in Motion vom Eadweard Muybridge, 1870er Joor

Die Animazioon entstoot dur s Zäige vo dr Serii Horse in Motion oobe nooche.

D Animazioon analüsiert d Beweegige, wo mä in dr Natur findet, setzt si aber nit nume 1:1 in dr Sünthese um, sondern mä cha si au verzerre oder mit eme veränderte Täiming umzsetze und bechunnt eso dramatischi oder komischi Effekt.

Dr grösst Däil vo dr Animazioon wird für e Drickfilmberiich broduziert, für s Kino oder s Färnsee, zur Underhaltig oder für d Wärbig. Es git aber au die bewegti Wisualisierig in dr Naturwüsseschaft, dr Archidektur, im Disäin oder dr Leer.

Animazioonstechnike

Bi dr Stop-Motion-Technik änderet mä jedes äinzelne Bild von ere Sekwänz e biirebitzli im Vergliich zum Bild vorhär. Doo drzue ghööre under anderem d Claymation (sog. Chnätfigurefilm) und Dittidrickfilm. Bi dr 2-D-Animazioon zäichnet mä äinzelni Bilder, wo sich jeedes echli underschäidet vom Bild vorhär (Zäichedrickfilm), ströit Sand uf e Lüüchtdisch, wo im Bild denn schwarz usgseet und bewegt dä Sand e bitzeli vo äim Bild zum neggste (Sand-uf-Glas-Animazioon), fotigrafiert beweegligi Forme wie Körperdäil vom ene Hampelmaa und veränderet deren iiri Posizion vo Bild zu Bild (Flachfigurefilm), und es git no vili anderi Technike in dere Kategorii. Bi dr 3-D-Animazioon loot mä Compiuterbrogramm d Beweegige vo de Figure lo usrächne und wie d Bilder denn usgseen.

• 
  E Bild us dr Dittidrickfilmserii Sandmännchen
• 
  Chnätfigure us dr Kuzmich-Serii vo de Max Sviridov Studios
• 
  E 3D Wisualierig mit em Brogramm Grapheur

Litratuur

• Harold Whitaker, John Halas: Timing for Animation. ISBN 0-240-51714-8
• Ollie Johnston, Frank Thomas: The Illusion of Life: Disney Animation. ISBN 0-7868-6070-7
• Mayer, R. E. (2001): Multimedia Learning. New York: Cambridge University Press. ISBN 0-521-78749-1
• Eric Goldberg: Character Animation Crash Course. ISBN 1-879505-97-5
• Richard Williams: The Animator's Survival Kit. ISBN 0-571-20228-4

Weblingg

• Teggstsammlig über e Animazioonsfilm
• Disney's 12 principles of animation (ängl.)

Dä Artikel basiert uff ere fräie Übersetzig vum Artikel „Animation“ vu de dütsche Wikipedia. E Liste vu de Autore un Versione isch do z finde.