Annika Murjahn
D Annika Murjahn (* 19. April 1978 z Fryburg) isch e dytschi Gschäftsfrau un eemooligi Schauspiileri, wu mer vor allem as Zoé Voss in dr ARD-Vooroobeseerie Marienhof chännt, wu si vu 1997 bis 1999 gspiilt ghaa het. Anne 2001 het si no ne Gaschtufdritt in dr Seerie ghaa. Hite läbt di friejer Schauspiileri z London un schafft as Mänätscheri un Projäktlaiteri.
Lääbe ändere
D Murjahn isch e Doochter vum Klaus Murjahn, wu 1978 bis 2008 Voorstandvoorsitzer vum Faarbebunternäme Deutsche Amphibolin-Werke (DAW SE) gsii isch. Si het s Abituur am Friedrich-Gimnaasium z Fryburg gmacht. Ab 1997 het si an dr Ludwig Maximilian Universität z Minche Wiirtschaft un Kommunikazioonswisseschafte aafange studiere un isch 1999 uf Chunschtgschiicht gwägslet. Noch em Grundstuudium isch si an d Université de Paris IV Sorbonne un derno bis 2008 an s Courtauld Institute of Art an dr University of London.
d Schauspiileri ändere
D Annika Murjahn het scho in ire Schuelzyt mit 14 Joor as Modäll gschafft, unter anderem fir Magaziin wie Vogue, Elle oder FHM. No dr Schuel het si Schauspiilunterriicht bim Gerd Silberbauer näbe ire Aarbet in dr Seerie Marienhof gnuu. Zwische 1999 un 2002 isch d Annika Murjahn au in dr Fäärnseeseerie Tatort, Sinan Toprak ist der Unbestechliche, Wilder Kaiser, SOKO 5113, Der letzte Zeuge, Die Rosenheim-Cops un Die Wache ufdrätte. Anne 2003 het si Rolle ghaa im Sat.1-Film Reiche Witwen küssen besser un in Plötzlich wieder 16 (ProSieben); 2004 het mer si in dr Rosamunde-Pilcher-Verfilmig Royal Flash un 2005 in Segel der Liebe gsää, 2005 in dr Pro7-Seerie Axel! will’s wissen. Im ZDF-Film Inga Lindström Wiedersehen in Eriksberg D/2009 het si d Milly Nickel gspiilt.
Im Kino isch d Annika Murjahn in dr Film Autobahnraser (2004) un Brothers Grimm vum Terry Gilliam (2005) z sää gsii.
d Gschäftsfrau ändere
Noch em Stuudium het si as Berooteri vum Harvey Weinstein gschafft un bi dr renommierte Londoner Aukzioonshyyser Christie’s un Sotheby’s as Spezialischti fir Alti Maischter. Anne 2007 het si d Online-Plattform Wellicious.com grindet. Im Joor 2009 het d Annika Murjahn d Schauspiilerei ändgiltig ufgee. Im Lauf vu dr 2010er Joor isch si Mueter vu zwoo Deechtere woore. 2012 isch si in d DAW SE retuurchuu, s Unternäme vu ire Familie, wu vu irem zee Joor eltere Brueder Ralf Murjahn gfiert wiird. Deert het si d Marke Caparol as Projäktlaiteri im strateegische Marketing ibernuu.[1][2][3][4]
Filmografy ändere
- 1997–2001: Marienhof (Fäärnseeseerie, 9 Folge)
- 2000: Tatort – Bienzle und der Mann im Dunkeln (Filmraie)
- 2001: 100 Pro
- 2002: SOKO 5113 (Fäärnseeseerie, Folg Henkersmahlzeit)
- 2003: Der letzte Zeuge (Fäärnseeseerie, Folg Das Klassentreffen)
- 2003: Die Rosenheim-Cops (Fäärnseeseerie, Folg Blattschuss)
- 2003: Plötzlich wieder 16 (Fäärnseefilm)
- 2004: Autobahnraser (Fäärnseeseerie)
- 2005: Rosamunde Pilcher (Fäärnseeseerie, Folg Segel der Liebe)
- 2005: Brothers Grimm (The Brothers Grimm)
- 2006: Axel! will’s wissen (Fäärnseeseerie, Folg Die neue Freundin)
- 2007: Unser Charly (Fäärnseeseerie, Folg Stunde der Wahrheit)
- 2008: ProSieben Funny Movie (Fäärnseeseerie, Folg Dörte’s Dancing)
- 2009: Inga Lindström (Fäärnseeseerie, Folg Wiedersehen in Eriksberg)
Weblink ändere
Fueßnote ändere
- ↑ #einefragedesdesigns: Annika Murjahn uf stilwerk.com
- ↑ Annika Murjahn soll für die „Alpinaweiß“-Dynastie den Luxusmarkt erobern, Handelsblatt, 7. Juni 2019
- ↑ Annika Murjahn uf welt.de
- ↑ Annika Murjahn uf faz.net