Anton Gallizian

Dr Anton Gallizian isch im 15. Joorhundert e früeje Babbierfabrikant z Baasel gsi.

Lääbe

Dr Antonius Galliciani, iidütscht Anton Gallizian, isch vo Casella in Ligurie choo und het as Aagstellte in dr erste Baasler Babbiirmüüli gschafft, wo dr Heinrich Halbisen bedriibe het. 1452 het er mit sinere Frau Adelheid Tschan e Hanfriibi am Rümelibach vor em Stäinedoor z Baasel kauft. 1453 het er sä für d Hammerschmiidi im Dalbeloch usduscht, und het die in e Babbiirmüüli lo umbaue. Im letschte Kwartal vom Joor 1453 het er zum erste Mol dr Pfundzoll zaalt, das häisst, ass scho aagfange gha het Babbiir z broduziere. 1457 het är und sini Brüeder s Baasler Bürgerrächt überchoo. In dr neggste Generazioon isch d Familie Gallizian zu äinere vo de riichste und mächtigste Familie z Baasel ufgstiige, het die Posizioon aber im ene politische Umsturz 1521, em sogenannte Bangsionesturm, verloore.

Hüte befindet sich im Geböid, wo dr Gallizian zur Babbiirmüüli het lo umbaue, dr sogenannte Gallizian-Müüli, s Schwizerische Museum für Babbiir, Schrift und Druck.

Litratuur

• Basler Papiermühle, Journal Nr. 4, Winter 2014.
• Pierre Louis van der Haegen: Der frühe Basler Buchdruck: ökonomische, sozio-politische und informationssystematische Standortfaktoren und Rahmenbedingungen. Baasel 2001.
• René Teuteberg: Basler Geschichte. 2. Aufl. Baasel 1988, S. 167 f.

Weblingg

• St. Alban-Tal Papiermühlen in „Die ersten Basler Buchdrucker“ uf altbasel.ch, abgrüeft am 1. Januar 2014

Dä Artikel basiert uff ere fräie Übersetzig vum Artikel „Anton_Gallizian“ vu de dütsche Wikipedia. E Liste vu de Autore un Versione isch do z finde.