Audrey Azoulay

D Audrey Azoulay (* 4. Augschte 1972 z La Celle-Saint-Cloud) isch e französischi Beamtin und Politikerin. Si isch d Generalsekretärin vo der UNESCO.

ihres Läbe

D Audrey Azoulay chunt us ere Familie vo marokkanische Sepharde. Ihre Vater isch der Journalischt und Politiker André Azoulay, und d Muetter heisst Katia Brami und isch e Schriftstellere. D Azoulay isch z Paris ufgwachse und het der Master i der Betriibswirtschaftslehr, wo si a der Uni Paris Dauphine und a der Uni vo Lancaster studiert het. Derzue ane het si au no z Paris am Institut für Politischi Studie und a der École nationale d’administration studiert. Si isch verhürootet mit em François-Xavier Labarraque und het zwöi Chinder.

Nach em Studium het si i der Abteilig für audiovisuelli Meedie vom französische Kulturminischterium und spöter bim Rächnigshof vo der Regioon Île-de-France und sid 2006 am nazionale Filmzäntrum vo Frankrych gschaffet. Si isch au als Expertin über d Meedie für die Öiropäischi Kommissioon gsi.

2014 het se der Presidänt François Hollande im Elysée-Palascht zur Berooterin für Kultur und Kommunikazioon gmacht, und zwöi Joor spöter isch si i der französische Regierig Ministerin für Kultur und Kommunikazioon woorde.

Wo ane 2017 en nöie Generalsekretär für d UNESCO, wo der Sitz z Paris het, gsuecht worden isch, het Frankrych d Audrey Azoulay derfür vorgschlage, und am 13. Oktober 2017 het se der UNESCO-Exekutyvroot in ere Wahl, wo verschideni Lüüt us bar Länder Kandidate gsi sind, den au gwählt. Am 10. November het se d Generalkomferänz vo de UNESCO-Mitglider i däm Ampt bestätiget. Si het gseit, d UNESCO sell sech bsunders für d Fraurächt, füre Schutz vo de Kulturgüeter vor em Terrorismus, für d Schuele z Afrika und für d Stüürig vo der Digitalisierig ysetze.

D Audrey Azoulay isch zur Kommandörin vom französische Orde für d Künscht und d Literatur ernänt worde.

Weblink

Commons: Audrey Azoulay – Sammlig vo Multimediadateie

Website vo der Audrey Azoulay für d UNESCO-Kandidatur
Christoph Hasselbach: Eine „Weltbürgerin“ wird UNESCO-Chefin. In: Deutsche Welle, 10. Novämber 2017