Citroën BX

Der Citroën BX isch äs Auto wo vu 1982 bis 1994 baut worre isch. D'Limousinä "Berline" isch im Citroën-Werch in Rennes iner Bretagne sowiä im schpanischä Vigo, der Combi "Break" bi der Firma Heuliez härgschtellt cho. Vorteilä vum BX sind ds sehr komfortabli Fahrwärch und di trotzdem guäti Schtrassälaag, der grüümig Innärum, di übersichtlich Carosserie und di sparsamä und trotzdem rassigä Motorä. Der BX isch relativ guät roschtgschützt xi, und äs schtönd hüt na verhältnismässig vill vu denä Autos im Betrieb.

Entwickligsgschicht

D' Entwickligsarbätä am Citroën BX hend schu im Jahr 1977 ahgfangä.

Nach der Iigliederig vu Citroën in PSA, Peugeot Citroën-Konzern hät d'Ära vu där Plattform-Schtrategie ahgfangä. S' neui Mittilklass-Modäll selti möglichscht vill Teili usm Peugeot-Regal bezüchä, derbii aber au mit der markätypischä Hydropneumatik usgschtattät cho.

Der Design-Entwurf isch vum Bertone-Designer Marcello Gandini urschprünglich fer Volvo, als Studiä "Tundra" vu 1979 entworfä cho, und im Citroën-Designzentrum Vélizy ama Fiinschliff unerzogä cho.

Di kantig BX-Carosserie isch mit nu halb so vill Schweisspunkt wiä ds Vorgengermodäll Citroën GSA uscho. Si isch bereits mit Hilf vu Computer (CAD) entwicklät. Äs isch bsundrä Wert uf Liichtbau gleit wordä, d'Heckklappä/Coferraumdeckäl, d'Siitäschiibä in dä C-Süülä bi dä Limousinä und bi dä meischtä aber nid bi allnä BX au d'Motorhuubä sind us Kunststoff gfertigät xi, und durch di Gwichtserschparniss isch der BX je nach Usfüärig sogar liichter xi wiä ds chlinner Vorgengärmodäll GSA.

Gschtaltig

Trotz der eckigä Form isch der Citroën BX relativ aerodynamisch. Ab 1985 isch der BX au als sehr grüümigä Combi "Break" baut cho. Der isch bis zur Rückbank identisch mit der Limousiinä, au der Radschtand isch gliich, er isch aber lenger und höcher als d'Limousiinä.

1986 isch der BX überarbeität cho; ussä erkennbar dur dgrössrä und ab jetzt wiiss iigfärbtä Blinkergläser vornä, innä du ä neus Armaturäbrätt mit normalä Ahzaigä und Lenkstockhebel anschtell vu Walzätacho und Bediensatellitä.

Motorä

XUD9 Diesel

Motoren
Hubruum	Leischtig	Bemerkigä
1360 ccm, Benzin	62-75 PS	Vergaser und Monopoint-Iischprützig, mit und ohni Kat
1580ccm, Benzin	88-104 PS	Doppelvergaser oder Monopoint-Iischprützig, mit und ohni Kat
1905 ccm, Benzin	96-125 PS	Iischprützer, (Monopoint- und Multipoint-), mit und ohni Kat
1905 ccm, Benzin	148-160 PS	Multipoint-Iischprützig, 16-Ventiler, mit und ohni Kat
1769 ccm, Diesel	60-62 PS	Wirbelchammerdiesel (in der Schwiiz nid erhältlich xi)
1769 ccm, Turbodiesel	90 PS	Wirbelchammerdiesel, EGR, Oxi-Kat
1905 ccm, Diesel	64-72 PS	Wirbelchammerdiesel, mit und ohni EGR und Oxi-Kat

Modällpalettä

RE/RI/RD: einfach usgschtattäti Benzin-Vergaser-/Benzin-Iischprützer-/Dieselversion, TRI/TRD: luxuriöser usgschtattäti Benzin/Dieselversion, GT/GTi: sportlicheri Benzin-Vergaser-/Benzin-Iischprützerversion GTi 16V/GTi 16S: sportlichi Version mit 16-Ventil, (frz: "16 Soupapes") TZI/TZD: luxuriöser usgschtattäti Benzin/Dieselversion wiä TRI/TRD ab 09/88 Star/TOP/Image/Millesime/Velvet: Sondermodäll

4WD

1989 hät Citroën d'Modäll BX 4WD und BX 4WD Break vorgschtellt. Er isch mitm 1.9-Liter-Motor mit 96-120PS oder, ussert iner Schwiiz, mitm 1.7-Liter-Turbodiesel-Motor usgschtattät xi. S Ahtriebsmechanik-Konzept mit permanentem Allradahtrieb mit 100%-sperrbarem Zentraldifferenzial und, bi ABS-Versionä, TORSEN-Differenzial aner Hinterachs, erinnerät an Audi Quattro. Bemerkenswärt isch, dass 4WD-Modäll im Innä- und Coferraum trotz der Hinterachs-Ahtriebsmechanik gnau gliich vill Platz büütät wiäs 4x2-Modäll! Dank der Hydropneumatik mit iischtellbarer Bodäfriiheit isch der BX vill Gländegängiger als mengä ander 4x4.

Am 4WD-Modäll sind im Underbodä aber vill Teili komplett andersch als bim 4x2-Modäll, und nid mit 4x2-Teili ustuschbar, drum au sehr vill tüürer und z. T. gar nüm erhältlich, zum Bischpil der Uspuff. Leider ischd Verzahnig an der Wellä zwüschä Verteiler- und Schaltgetriebe vill zschwach usglait und gait bi fasch allnä BX 4WD kabutt. S Ersatzteil isch neu nümä meh lieferbar und der Ustusch erforderät d'Demontage vu Motor und Getriebe.

D'Ablösig

S'End vum BX isch in 2 Schritt cho: 1993 isch ds Nachfolgemodäll Xantia vorgschtellt cho und d'BX-Limousiinä-Produktion iigschtellt. 1994 isch denn au der Break usm Modällprogramm gschtrichä cho.

Weblinks

Commons: Citroën BX – Sammlig vo Multimediadateie

http://www.citdoks.de Intressanti und nützlichi Dokument und technischi Datä zu Citroën-Fahrzüg, düütsch
http://www.bxig.net Citroën BX Inträssensgmeinschaft, düütsch