Bandschibe

D Bandschibe (Discus intervertebralis) oder Zwöschewirbelschibe isch e flexibli Verbidnig zwöschet de Wirbel und het d Funktion vo de Abfederig vo Stöss. De Mentsch het 23 Bandschibe, wo ide Hals-, Brust- und Lendewirbelsüüli liget. Si machet öppe e Viertel vo de Längi vo de Wirbelsüüli uus.

Uufbau

E Bandschibe bistoot useme üssere Faserring und enere innere Galertmasse. De Faserring (Anulus fibrosus) bistoot us Bindegweb, wo e straffe Ring bildet. De isch fest mit de Deckelplatte vo de Wirbel verbunde. De Gallertchern (Nucleus pulposus) isch waich und wasserhaltig. Us dem Grund isch e Bandschibe elastisch und cha Schlääg und Stööss uusgliche, äänlich emene Wasserchüssi, und de Druck werd gliichmäässig vertailt.

D Bandschibe werd nöd mit Bluet versorget. Dör regelmässigs Laufe, werded d Bandschibe regelmäässig bilastet und entlastet, wobii jedesmool bim Zämepresse echli Flüssigkait uuspresst werd und bim Entlaste werd jedesmool echli Flüssigkait vom umligede Gweb uufgnoo. Da lenget um d Bandschibe zernääre. Bi Mensche wo zwenig laufed und vill stönd oder sitzed chunnts aber zo Underernäärig vo de Bandschibe.

Bim Lige und Schlooffe sind d Bandschibe entlastet und nemet debii Wasser uuf, wobi si debii echli grösser weret. Drum isch d Wirbelsüüli em Moorge öppe zwee Santimeeter länger as em Oobe vorem Isbettgoo.

Degeneration

Im Alter verlüüret d Bandschibe nodisnoo d Fähigkait Wasser uufznee und wered wege demm weniger elastisch und tröchnet langsam uus und schrumpflet. Da isch ann Grund, werum alti Lüüt chlinner werdet. Denebet weret au Stööss und Schlääg weniger abgfederet wa zu wittere Abnutzigserschiinige vo de Wirbelsüüli füert.

Bandschibevorfall

E Bandschibevorfall (Discus prolapsus) isch e Riss im Faserring, wa zor Folg het, as Galertmasse ustrete tuet. Si druckt denn maist uf e Nerff und tuet drumm au zimmli wee. E Bandschibevorfall mue sofort ärztlich bihandlet were.