Chemischi Baase

Baase (griechisch βάση, basé – d Usgangslaag, d Grundlaag, s Fundamänt) si im ängere Sinne alli chemische Verbindige, wo wenn si in ere wässrige Löösig si, Hydroxid-Ione (OH⁻) chönne bilde, also dr ph-Wärt von ere Löösig chönne hööcher mache. Hydroxid-Ione si chemischi Verbindige, wo Protone von ere Süüri chönne übernee und drbii e Wassermolekül bilde. E Baase isch also s Gegestück zun ere Süüri und cha die nöitralisiere.

Im witere Sinn beschriiben verschiideni Süüri-Baase-Konzept wääsentlig bräiteri Palette vo chemische Reakzioone, wo über d Äigeschafte vo Hydroxidione in Wasser chönne uusegoo. Bsundrigs bedütsam si d Konzept noch em Lewis (Lewis-Baase und Lewis-Süüri) und noch em Pearson, wo vo herte und wäiche Süürene und Baase schwätzt (HSAB-Konzept).

Äigeschafte vo Baase

Wenn Ammoniakwasser und Salzsüüri in Kontakt chömme, reagiere d Gaas Chlorwasserstoff as Süüri und Ammoniak as Baase zum Ammoniumchlorid-Rauch und nöitralisiere sich.

E Hufe Baase si in Wasser lööslig (z. B. Natriumhydroxid, Ammoniak), aber nid alli (z. B. Aluminiumhydroxid)
Si äätze und zerstööre organischi Stoff.
Us Öl und Fett bilde si Säifi und Glycerin.
Es git starki und schwachi Baase.
Baase cha mä mit Wasser verdünne, und iiri Wirkig wird je noch dr Verdünnig schwecher.
Die baasische Löösige mache Phenolphthalein root und färbe roots Lackmus-Babbiir blau.
D „Gegespiiler“ vo de Baase (Baaselöösig = Lauge) si d Süürene (vgl. Abbildung). Si chönne Baase nöitralisiere. Au Süürene äätze und grife vili anderi Stoff aa, wo nid umbedingt mit Baase reagiere.
Baase si e Gfoor für Chläider, Hut und Auge. Mä sött imer e Schutzbrülle aahaa, wemm mä mit Baase hantiert.

Dä Artikel basiert uff ere fräie Übersetzig vum Artikel „Basen_(Chemie)“ vu de dütsche Wikipedia. E Liste vu de Autore un Versione isch do z finde.