S Baadhüüsli im Baasler Quardier Santihanns
Koordinate: 47° 34′ 0,3″ N, 7° 34′ 54,8″ O; CH1903: 610781 / 268459
| Dialäkt: Aagglobaseldütsch |
S Baadhüüsli isch e historischs Geböid an dr Elsässerstrooss 2 im Santihanns z Baasel. Es isch emol en öffentligi Baad- und Wäschaastalt gsi, hüte isch s e Zentrum für Juugedkultuur. S Geböid stoot grad näben em Santihannsdoor dusse vor dr ehemoolige Stadtmuure und isch äins vo de Baasler Kulturgüeter, wo für d Regioon vo Bedütig si.
Die öffentlige Baad- und Wäschaastalte z Baasel
ändereS Duschbaad Santihanns isch vom Theodor Hünerwadel im historisierende Stiil 1905/1906 baut worde[1] und gseet e chli us wien e Rönessans-Schlössli mit abgstuefte spootgotische Fänster. Es isch Däil vom e soziale Brogramm us em spöötere 19. Joorhundert gsi, in jedem Quardier e Baad- und Wäschaastalt ufzmache, wil vili Woonige in dr Stadt, vor allem vo de ermere Bevölkerigsschichte, kä äignigs Baadzimmer gha häi und das isch no bis in d Middi vom 20. Joorhundert eso bliibe. Und für dass d Lüt sich s au chönne läiste go z baade, isch dr Iidritt subwenzioniert worde.[2]
No in de 1990er Joor söll s in dr Stadt öbbe 3500 Woonige gee ha, wo s weder e Baadwanne no e Duschi gee häig. No di no häi aber immer weeniger Lüt die öffentlige Beeder brucht und die si äins noch em andere zuedoo worde bis im Summer 2013 s letschte von ene, s Istäinerbaad im arme Chläibaasel, gschlosse worde isch.[3]. S Santihanns Baadhuus isch schon e baar Joorzäänt vorhäär an dr Räije gsi.
S Juugedzentrum
ändere1975 isch s erste Juugendzentrum im Santihanns im doomolige Leonhard Ragaz Huus ufdoo worde. Si Erfolg bi de Junge isch aber zum e Brobleem worde, wil sich Noochbere am Lärm gstöört häi. Mä het denn in de 1980er die alti Baad- und Wäschaastalt an dr Elsässerstroos umfunkzioniert und drus s Juugedkultuurzentrum Baadhüüsli gmacht, wo 1987 iigweit worde isch.
Wenn s Baadhüüsli am Aafang vor allem en offnige Dräffpunkt für die Junge gsi isch, inwestiert mä hüt mee in dr Förderig vo dr Juugendkultuur und vo dr Sozialruumorientierig. 2014/15 het mä drfür en Umbau gmacht. [4]
Lingg
ändereFuessnoote
ändere- ↑ Elisabeth Crettaz-Stürzel: "Heimatstil: Reformarchitektur in der Schweiz 1896-1914", 2. Band, S. 85, Huber, 2005
- ↑ bazonline: Das letzte Brausebad der Stadt
- ↑ SRF Regional Diagonal, 02.03.2013, 12:03 Uhr: Die letzte Bad- und Waschanstalt in Basel schliesst
- ↑ D Website vom Baadhüüsli