D Baasler Konzilsuniwersidäät

Dialäkt: Aagglobaseldütsch

D Baasler Konzilsuniwersidäät het vo 1432 bis 1448 bestande. An dere Uni häi meereri Persone underrichdet und studiert, wo denn 1460 bi dr Gründig vo dr Baasler Uniwersidäät e wichdigi Rolle gspiilt hän.

D Uniwersidäät isch für d Däilnäämer vom Konzil und iiri Begläiter iigrichdet worde, won e Däil von ene iiri Studie nonig abgschlosse gha het und wil s e Uniwersidäät für Kleriker gsi isch wie die römisch Kurieuniwersidäät, isch s Hauptgwicht uf dr theologische und juristische Usbildig glääge.

D Iniziative für d Gründig vo dr Uni äi Joor noch em Aafang vom Konzil isch woorschinlig vo de Familiare us cho. E Legat het s Ganze noch de Vorbilder vo dr Bariiser Uniwersidäät und dr Uniwersidäät vo Bologna organisiert, und s Konzil het dr Brofässer ernennt und bestimmt, ass däm si Leer as Uniwersidäätsleer söll anerkennt und wääred em Konzil bi dr Graduierig aagrächnet wärde.[1]

Bi dr Gründig vo dr Uniwersidäät Baasel 1460 häi Graduierti und Mitgliider vo dr Konzilsuniwersidaat e wichdigi Rolle gspiilt. Mänggi häi dr Baasler Root beroote, anderi si Rööt vom Habsburger Albrecht VI., wo under anderem Herrscher über die Vordere Land gsi isch und as Landesher 1457 d Uniwersidäät Freiburg gründet het.

Zu de iiflussriiche Persoone bi dr Gründig vo dr Uni häi dr Heinrich vo Bäihäim ghöört, wo 1437 an dr Konzilsuniwersidäät zum Doktor vo de Dekretale bromowiert het, dr Peter zum Luft, wo dr erst Dekan vo dr nöije juristische Fakultäät worde isch, dr Georg vo Andlau, wo 1460 d Uni gläitet het, und dr Petrus Testoris, wo 1469 Räkter worde si. [2]

Fuessnoote ändere

  1. Brigide Schwarz, Kurienuniversität und stadtrömische Universität von ca. 1300 bis 1471, Brill 2012, S. 389f.
  2. Vorgeschichte(n): Konzilsuniversität und Gründungswelle uf dr Website vo dr Uni Baasel, abgrüeft am 23/11/2019