Benedikt vo Nursia

Dr Heilig Benedikt oder au Benedikt vo Nursia (* um 480 z Nursia (Umbrie); † 21. März 547 ufem Monte Cassino) isch en Äisidler, Apt und Ordensgründer gsi.

Dr Benedikt isch z Nursia als Soon vom ene Landpsitzer uf d Wält cho. Sini Schwöschter isch die heiligi Skolastika gsi. Er het z Rom gstudiert und isch drufabe id Wildnis mit anderne Äisidler go lääbe und het drno drü Joor lang in ere Höhli bi Subiaco (das isch im Latium) ghuuset. Er isch wytume bekannt worde, und so het men en als Apt vom Chlooschter z Vicovaro ygsetzt. Er het s Chlooschter San Clemente z Subiaco und no anderi Chlööschter i dr Region gründet und isch anne 529 mit baar Begleiter ufe Monte Cassino ggange. won er sis wichtigschter Chlooschter gründet het. Für d Mönch vo däm Chlooschter het er Statute ufgsetzt, wo i dr ganze wältwyte Gruppe vo de Benediktiner-Chlööschter bis hüt als «Benediktsregle» e Grundlag vom Mönchsläben isch.

Dr Papscht Gregor dr Grooss het am Ändi vom 6. Joorhundert d Läbensgschicht vom Benedikt ufgschribe.

Dr Benedikt vo Nursia gilt bi de katolische, de orthodoxen und de armenische Chrischte als Heilige. Er isch dr Patron vo de Schuelchind und vo de Lehrer. Sin Gedänktag isch hüt, sid anne 1970, a de meischten Ort dr 11. Juli; sid em Middelalter het me ne deils am 21. Merze verehrt, won er gstorben isch, und bi de Benediktinerchlööschter isch das no immer dr Benediktstag.

Anne 1964 het iin dr Papscht Paul dr Sächst als «Patron vo Europa» gwäält.

Literatur

Tino Licht: Die ältesten Zeugnisse zu Benedikt und dem benediktinischen Mönchtum. In: Erbe und Auftrag, 89. Jg. (2013).
Raphael Molitor (Hrsg.): Vir Dei Benedictus. Eine Festgabe zum 1400. Todestag des Heiligen Benedikt. Münster 1947.
Bernardin Schellenberger: Benedikt von Nursia. Der Werdegang eines spirituellen Meisters. Würzburg 2015, ISBN 978-3-429-03812-0.
Adalbert de Vogüé: Benedikt von Nursia. In: Theologische Realenzyklopädie. Band 5, 1980, S. 538–549.

Weblink

Benedictus de Nursia im dütschsprochige Wikisource

Commons: Benedikt von Nursia – Sammlig vo Multimediadateie

Benediktiner im düütsche Sproochruum (benediktiner.de)
d Regle vom Benedikt online uf benediktiner.de