Bröuerej Ganter

D Bröuerej Ganter (dt. Brauerei Ganter) isch e draditionsryychi Bröuerej z Fryybeg.

Brauerei Ganter
Unternähmensform	GmbH & Co. KG
Gründig	1865
Sitz	Fryybeg, Dytschland
Leitig	Detlef Frankenberger Hartmut W. Martin
Branche	Bröuerej
Uffdritt im Netz	www.ganter.com

Gschicht

Yyfahrt vu dr Bröuerej an dr Schwarzwaldstroß

D Bröuerej isch anne 1865 vum Ludwig „Louis“ Ganter im Huus Zum Kindlein Jesu (Schiffsgass 7) grindet wore, wu dr Erasmus von Rotterdam vu 1531 bis 1534 gwohnt gha het. Dr Ganter het e verblibeni chleini Bröuaalag us em 18. Johrhundert gnutzt, wun er zämme mit 700 Holzfässer gchauft gha het. Bis 1888 isch in däm Huus s Bier vu dr Bröuerej bröue wore. Fryybeg isch in däre Zyt schnäll aagwagse un d Bröuerej het scho dertemol floriert. Speter isch s Huus dr Stammsitz vu dr Firma wore mit eme Wirtshuus un eme Bröuerejuusschank.

Anne 1888 het dr Ganter schließli ne Grundstuck in dr Fryybeger Oberau, chenne ufchaufe, di Alt Elmihli. Dert het er derno noch eme modärne tächnische Standard chenne produziere. Näbe dr großzigige un fir e wyters Wagstum aagleite Bröuerejaalage isch e eigene Diefbrunne aagleit wore, go s bescht Wasser z Verfiegig haa, un e eige Chraftwärch isch böue wore

Dur dr wirtschaftli Ufschwung vu Sidbade un di verbesserete Produktionsmethode het d Bröuerej als floriert un het ihre Bier um d Johrhundertwändi au uf Nordbade verchauft.

In dr 1920er Johr het dr Suhn vum Ganter, wu d Bröuerej ibernuu gha het, gege jede Experterot e hochmodärni Dampfturbine fir s chlei Firmechraftwärch durgsetzt. Wu in dr Nacht 2. uf dr 3. Dezämber 1944 au d Bröuerejaalage droffe un s Stammhuus vu dr Bröuerej in dr Altstadt zerstert woren isch, het d Bröuerej einewäg chenne wyter produziere un dur ihri autonome Turbine-Stromversorgig au d Aawohner mit frischem Drinkwasser chenne versorge.

In dr Noochriegszyt het Ganter nimi an dr Erfolg vu dr Vorchriegszyt chenne aachnipfe. Noch eme langsame Nidergang setzt d Bröuerej hite uf ihri regional Verwurzlig un e Sortimänt, wu meh uf jungi Konsumänte zuegschnitten isch.

Sortimänt

Ganter stellt näben eme Pils, eme Export un eme Starkbier (Wodan) hälls, dunkles un krischtallchlars Weise här, derzue d Malzbiermarke Vitamalz.

Im Aagebot git die Biersorte:

• Freiburger Pilsner (nume Fläschebier)
• Ganter Pilsner – Premium herb
• Ganter Urtrunk – Naturtrübes Vollbier
• Ganter Spezial – Feines Export
• Ganter echt badisch Weizen Hefehell
• Ganter echt Weizen Hefedunkel
• Ganter Weizen Kristallklar
• Ganter alkoholfrei
• Ganter Radler
• Ganter Wodan (Starkbier)
• Vitamalz (alkoholfrejs Malzbier)

Näbe dr Härstellig un em Verdriib vu eigene Biersorte verdrybt Ganter syt Aafangs 2008 au Getränk vu dr Firma Coca-Cola im Gaschtronomiberaich.

Bsunderheite

As Unternähme in dr „Ökostadt“ Fryybeg het d Bröuerej Solaraalage uf em Dach un bezieht ihri Raustoff so wyt s goht us dr Gegnig, zem Deil au us ökologischem Aabau.

Ganter tritt z Fryybeg un in dr Region als as Sponsor fir Kultur un Sport uf.

D Lagerhalle, s Sudhuus un s Frejgländ vu dr Bröuerej wäre au fir großi Veraastaltige un Feschter brucht.

Weblink

• Internetufdritt vu dr Bröuerej Ganter

Dä Artikel basiert uff ere fräie Übersetzig vu dere Version vum Artikel „Brauerei_Ganter“ vu de dütsche Wikipedia. E Liste vu de Autore un Versione isch do z finde.

47.9902777777787.8602777777778