Bruno Fuchs
| Dialäkt: Mìlhüüserdiitsch |
Dr Bruno Fuchs (* 7. Àwrìl 1959 z’ Kolmer, Owerelsàss) ìsch a frànzeescher Schurnàlìscht un Politiker vu dr Pàrtäi Mouvement démocrate (MoDem). Sitter 2017 ìsch’r Àbgoordnet’r vum Owerelsàss ìn dr Nàzionààlversàmmlung, un sitter 2021 ìsch’r àui Mìtglììd ìm Elsassischa Départementsroot.
sii Laawa un Kàrriar
ändereDr Bruno Fuchs ìsch dr Suhn vum Kolmarer Politiker Jean-Paul Fuchs.[1] Ar ìsch z’ Kolmer uffgwàcksa. Ar ìsch ìns Bartholdi-Gümnààsium z’ Kolmer gànga. D’rnooh hàt’r a Àbschluss àn dr Hoochschüal fìr Betriibsverwàltung bschtànda.
Ànna 1983 ìsch’r Schurnàlìscht biim Farnsahsander TF1 worra — ar ìsch schtällvertrattender Brìchter fìr öiropäischa-n-Ààglaagahaita z’ Brüssel gsìì. Ar hàt àui ìn dr Wìrtschàftsdianscht vum Kànààl gschàfft, unter dr Laitung vum Hervé Bourges. Ànna 1992 ìsch’r Moderàtoor un Uffsàtzlaiter vum Journal de la nuit, dr nachtliga Noohrìchtasandung uff TF1, worra. Ànna 1995 ìsch’r biim Jean-Marie Cavada Uffsàtzlaiter un Moderàtoor vu dr Tààgessandung Atout savoir uff’m Kànààl La Cinquième worra. Àb’m Harbscht 1998 hàt’r d’ Sandung Comment faire uff France 2 moderiart.[2]
Ànna 2008 hàt dr Fuchs d’ Kommunikàzioonsàgantüür Image et stratégie vum Thierry Saussez ìwwernumma.[3] Ìm Joohr 2014 hàt’r zamma mìt’m Vincent Champain un em Éric Fromentin d’ wìrtschàftlig-politischa Dankfàwrìk „L’Observatoire du long terme“ grìnda.[4]
Ìm Septamber 2015 hàt dr Bruno Fuchs dr frànzeescha Presidànt François Hollande bii’ma Bsüach ìm Màrokko beglaita.[5] Ìm Oktoower 2016 ìsch’r Mìtglììd ìm Emmanuel Macron siinera Beweegung En Marche! worra.[1] Bii dr Pàrlamantswàhl vu Jüüni 2017 ìsch’r ìm 6. Wàhlkrais vum Owerelsàss àls Àbgoordnet’r ìn d’ Nàzionààlversàmmlung gwählt worra — ìn dr zwaita Wàhlrunda hàt’r a Kàndidààt vum Front National mìt 64,16 Prozant vu da Schtìmma gschlààga.[6] Àls Àbgoordnet’r ìsch’r vu Jüüni 2017 bis ìm Septamber 2019 Mìtglììd ìm Üssschuss fìr d’ Üsswartiga-n-Ààglaagahaita gsìì, un nochamol àb Oktoower 2020. Zwìscha Septamber 2019 un Oktoower 2020 ìsch’r Mìtglììd ìm Üssschuss fìr d’ kültürälla-n-Ààglaagahaita gsìì. Ar ìsch àui Vorsìtzender vu dr Frììndschàftsgrupp Frànkrììch - Äkwàtoriààlguinea. Ar ìsch biigordneter Vorsìtzender vu dr pàrlamäntààrischa Versàmmlung vu dr Frankofonii worra.
Àn dr Pàrlamantswàhl vu Jüüni 2022 ìsch’r mìt 55.31 Prozant vu da Schtìmma-n-àls Àbgoordnet’r wììdergwählt worra — ìn dr zwaita Wàhlrunda hàt’r d’ RN-Kàndidààtin Christelle Ritz mìt 55,31 Prozant vu da Schtìmma gschlààga.[7]
Dr Bruno Fuchs ìsch mìt dr Schurnàlìschta Véronique Robert verhiiroota gsìì. Ìm Jüüni 2017 ìsch d’ Robert àn da Folga vun ìhra Verlätzunga noh ema Bùmban-ààgrìff ìm Iràk gschtoorwa.[8]
Weblìnks
ändere- Ìm Bruno Fuchs siina offiziälla Websitta (frànzeesch)
- dr Bruno Fuchs bii dr Pàrtäi Mouvement démocrate (frànzeesch)
- dr Bruno Fuchs ìn dr Àbgoordneta-Dàtabànk vu dr Nàzionààlversàmmlung (frànzeesch)
- dr Bruno Fuchs ìn dr Base Sycomore vu dr Nàzionààlversàmmlung (frànzeesch)
- dr Bruno Fuchs bii NosDéputés.fr (frànzeesch)
- dr Bruno Fuchs bii dr Haute Autorité pour la Transparence de la Vie Publique (frànzeesch)
- dr Bruno Fuchs bii dr Pàrlamäntààrischa Versàmmlung vum Öiropàroot (anglisch, frànzeesch)
Ainzelnoohwiisa
ändere- ↑ 1,0 1,1 Aude Raso: Législatives : qui est Bruno Fuchs, le nouveau député REM de la 6e circonscription du Haut-Rhin ? France Bleu, 18. Juni 2017, archiviert vom Original am 9. Dezember 2022; abgruefen am 20. März 2023 (französisch).
- ↑ Marie-Dominique Arrighi: Première rentrée sans Jacques Martin. In: Libération. 1. September 1998, archiviert vom Original am 11. September 2021; abgruefen am 20. März 2023 (französisch).
- ↑ Capucine Cousin: Ces personnalités de la com' et des médias qui deviennent députés. In: Challenges. 19. Juni 2017, archiviert vom Original am 24. Oktober 2022; abgruefen am 20. März 2023 (französisch).
- ↑ L'Observatoire du long terme, pour sortir de la dictature de l'immédiat. In: La Tribune. 30. Dezember 2014, archiviert vom Original am 28. November 2022; abgruefen am 20. März 2023 (französisch).
- ↑ Pierre-Olivier Rouaud: Maroc : les patrons qui accompagnent François Hollande à Tanger. In: L’Usine nouvelle. 20. September 2015, archiviert vom Original am 25. Juni 2021; abgruefen am 20. März 2023 (französisch).
- ↑ Résultats des élections législatives 2017 : Haut-Rhin (68) - 6ème circonscription. Ìnnaminìschterium vum Frànkrììch, archiviert vom Original am 8. August 2022; abgruefen am 20. März 2023 (französisch).
- ↑ Résultats des élections législatives 2022 : Haut-Rhin (68) - 6ème circonscription. Ìnnaminìschterium vum Frànkrììch, archiviert vom Original am 29. September 2022; abgruefen am 20. März 2023 (französisch).
- ↑ Alexis Delcambre: La journaliste Véronique Robert était « une vraie professionnelle de la guerre ». In: Le Monde. Archiviert vom Original am 12. Februar 2022; abgruefen am 20. März 2023 (französisch).