Buleuterion

E Buleuterion (altgriech. βουλευτήριον, bouleutērion) isch in de Stadtstaate im antike Griecheland dr Versammligsruum vo dr Bule, em Root vo dr Stadt, gsi. D Volksversammlig (Ekklesia) het sich im Ekklesiasterion versammlet, wo wääsentlig gröösser gsi isch.

Dr Grundriss vom Geböid isch mäistens rächteggig gsi und het im Innere vilmol d Form vom ene chliine Theatersaal ghaa, mit Sitzräije um e Vordragsberiich ume. D Räije vo de Sitz si gege hinde immer hööcher worde und si mänggisch im ene Halbkräis aagordnet gsi wie z Milet oder im ene Rächtegg wie z Priene. Do und dört si s aber äifach Bänk oder Stüel gsi, wo uf em eebene Boode gstande si.

Wil d Geböid doch eender grooss gsi si mit ere schmaale Site vo vilmol mee as fufzää Meter, het mä d Decki mit Süüle müesse stütze.

Dr Iigang vo de Buleuterie isch vilmol ufwändig gsi oder isch wie z Milet mit Süülehalle kombiniert worde. Es si Representazionsbaute vo de Stedt gsi, mäistens zentral und brominänt im Stadtbild.

Räst vo antike Buleuterie cha mä z Apollonia, z Delfi (mit Doppelapside), Ephesos, Iasos, Delos, Olympia, Priene und z Milet gsee. Uf dr Agora vo Athen het män en alts und e nöis Buleuterion gfunde.

Litratuur ändere

Rüdiger Meinel: Das Odeion: Untersuchungen an überdachten antiken Theatergebäuden. Lang, Frankfurt am Main u. a. 1980, ISBN 3-8204-6462-X (Europäische Hochschulschriften. Reihe 28: Kunstgeschichte. 11), (Zugleich: Köln, Univ., Philos. Fak., Diss., 1976).
Valentin Kockel: Bouleuteria. Architektonische Form und urbanistischer Kontext. In: Michael Wörrle, Paul Zanker (Hrsg.): Stadtbild und Bürgerbild im Hellenismus. Kolloquium, Münche, 24.–26. Juni 1993. Beck, Münche 1995, ISBN 3-406-39036-6, S. 29–40 (Vestigia, 47).
Norbert Feller: Hypostyle Saalbauten in der griechischen Architektur. Oberhummer-Gesellschaft, Münche 2004, ISBN 3-934137-05-9 (Studien zur Geschichte Nordwest-Griechenlands 5).
Taner Korkut, Götz Grosche: Das Bouleuterion von Patara. Versammlungsgebäude des Lykischen Bundes. Ege Yayinlari, Istanbul 2007, ISBN 978-975-8071-65-4 (Patara II, 1).

Dä Artikel basiert uff ere fräie Übersetzig vum Artikel „Buleuterion“ vu de dütsche Wikipedia. E Liste vu de Autore un Versione isch do z finde.