Chienbäse
As Chienbäse bezäichnet mä ä Fasnachtsveraastaltig z Liestal, im Hauptort vom Schwizer Kanton Basel-Landschaft. Er findet jedes Joor am Sunndigoobe noch em Aschermittwuch statt. Drbii wärde Fööreschitli zu «Bääse» zämmebunde, aazündet und dur d Altstadt vo Liestel dräit. Ä son ä Bääse isch zwüsche 20 und 100 Kilo schwer. Dr Höhepunkt vom Umzug si d Füürwääge, öbbe zwanzig Wääge us Iise, wo uf jeedem meereri Ster Holz aazündet wärde. Das brennt bsundrigs hooch, grad wenn d Wääge under em Liestler Ooberdoor duure si.
Dr Aalass ziet Zääduusigi vo Zueschauer us dr ganze Schwiz und em Usland um Baasel aa. Dass z Liestel scho vor mee as 200 Joor am Funkesunndig Hööchifüür uf dä Bärg Burg und Wissi Flue aazündet worde si, stoot in alte Chronike us sällere Zit. Sit 1902 häi im Zämmehang mit dr Fasnacht Fackleumzüg dur Liestel stattgfunde. Mit em Chienbäse-Umzug sälber het aber erst dr Liestler Beck Eugen Stutz noch em Erste Wältchrieg aagfange. Zerst het er nume e chliine Umzug mit Schüeler organisiert, won er denn 1924 us em Usland wider häichoo isch, isch dr Umzuug grösser worde.[1]
Z Dütschland isch dr Chienbäse as Füürwaagenumzug bekannt. Hüte het sich dr Bruuch ooni d Füürwääge under em Naame «Füürbäse» au z Sirnach im Kanton Thurgau iibürgeret.
Sicherhäit ändere
Für d Veraastaltig gälte strängi Sicherhäitsreegle. Si stoot under em Kommando vom Füürweerkommandant vo dr Stützpunktfüürweer Liestel, wo vo de Füürweere us dr Umgääbig understützt wird. Zueschauer wärde bittet, ass si alti Chläider sölle aazie, wo nit liicht aazündbar si. Wäge dr groosse Hitz müesse sich d Zueschauer vilmol bücke, bsundrigs, wenn d Wääge e churze Halt mache. Wil s Publikum eso grooss isch und d Stroosse in dr Liestler Altstadt seer äng si, cha mä kuum hinderzi laufe.
D Rute ändere
D Rute foot in dr Burgstrooss aa und goot über d Roothuusstrooss, d Räbgass, d Gärbergass bis zum undere Gestadeckblatz bi dr Rosenmund Chrüzig. No bevor dr äigentlig Füürumzug afoot, git s am Vierdel ab Sibni e Ladärnezug. Fasnachtsclique drääge kunstvoll gmachdi Ladäärne mit sich, wie mä sä au an dr Basler Fasnacht cha gsee.
Weblingg ändere
Commons: Chienbaese – Sammlig vo Multimediadateie- Website vo dr IG Chienbäse
- Offizielli Färnseesändig vom Chienbäse Liestel
- Fasnacht in Liestal
- Chienbäse-Karte vo dr Stützpunktfüürweer Liestel
- Erklärig vom Chienbäse z Liestal
Fuessnoote ändere
- ↑ Geschichte des Chienbäse Archivlink (Memento vom 8. Dezämber 2014 im Internet Archive) Website vom Chienbäse-Veräin. Abgrüeft am 12. Juni 2014.
|
Dä Artikel basiert uff ere fräie Übersetzig vum Artikel „Chienbäse“ vu de dütsche Wikipedia. E Liste vu de Autore un Versione isch do z finde. |