Chlorophyta

Chlorophyta
Pediastrum duplex
Systematik
Klassifikation: Läbewäse Domäne: Eukaryote (Eucaryota) ohne Rang: Archaeplastida ohne Rang: Chloroplastida ohne Rang: Chlorophyta
Wüsseschaftlige Name
Chlorophyta
Pascher, 1914, emend. Lewis et McCourt, 2004

D Chlorophyta sin grieni Alge, wu zue dr Chloroplastida ghere. Zämme mit dr algenartige Verdrätter vu dr Charophyta bilde si di paraphyletisch Gruppe vu dr Grienalge.

Merkmol

Bi dr Chlorophyta chemme fascht alli Organisationsstapfle vor: begaißleti Aizäller, uuverzwygti un verzwygti Fadenalge, blattartigi Thalli, au Flächtthalli un Gwääbthalli. D Gaißle vu dr beweglige Zälle sin s zwait oder e Vylfachs vu zwai. E stärnfermigi Struktur am Basallyyb vu dr Ibergangszone verbindet d nyyn Baar Mikrotubuli, wu ne Gaißle bilde. D Plaschtide hän zwoo Membrane, aber kai periplaschtidär Endoplasmatisch Reticulum. D Thylakoid vu dr Plaschtide sin einzeln oder bige. As Reservecheholehydrat wird Sterchi bildet. D Zälle hän e Glykolat-Dehydrogenase.

D Zällwand bstoht, wänn s aini het, us Zällulose. D Zälldailig goht ohne d Bildig vun eme Phragmoplascht.

Vorchuu

D Chlorophyta läbe zmaischt im Plankton un Benthos vum Sießwasser. E baar greßeri Arte chemme im kischtenoche Beraich vu dr Meer vor. Im Meerplankton fähle si fascht ganz. E baar Verdrätter läben an fychte Standort an Land, epiphytisch uf Baum usw. E baar läben au symbiontisch in Fläächten oder intrazellulär in Dier, zem Byschpel in Sießwasserpolype (Hydra).

E baar Verdrätter hän sekundär ihri Chloroplaschte verlore un läbe heterotroph.

Syschtematik

Zue dr Chlorophyta ghert d Mehzahl vu dr Grienalgenarte, zue dr Charophyta ghere weniger. No Guiry in AlgaeBASE (2012) umfasse d Chlorophyta iber 4500 Arte. Die wären in 12 Klasse gruppiert:

• Unterstamm Prasinophytina:
  • Mamiellophyceae, mit ebe 16 Arte
  • Nephroselmidophyceae, mit ebe 26 Arte
  • Prasinophyceae, mit ebe 97 Arte
• Unterstamm Tetraphytina:
  • Chlorodendrophyceae, mit ebe 43 Arte
  • Chlorophyceae, mit iber 2300 Arte
  • Siphonocladophyceae, mit ebe 401 Arte
  • Trebouxiophyceae, mit ebe 546 Arte
  • Ulvophyceae, mit ebe 522 Arte
• wyteri Klasse:
  • Bryopsidophyceae, mit ebe 521 Arte
  • Dasycladophyceae, mit etwa 50 Arte
  • Pedinophyceae, mit ebe 22 Arte
  • Pleurastrophyceae, mit 3 Arte

Anderi, chlaini Gruppe, wu dailwys zue dr Chlorophyta zellt wäre, wäre vu Adl et al. diräkt in d Chloroplastida yygordnet.

Literatur

• Sina M. Adl, Alastair G. B. Simpson, Mark A. Farmer, Robert A. Andersen, O. Roger Anderson, John A. Barta, Samual S. Bowser, Guy Bragerolle, Robert A. Fensome, Suzanne Fredericq, Timothy Y. James, Sergei Karpov, Paul Kugrens, John Krug, Christopher E. Lane, Louise A. Lewis, Jean Lodge, Denis H. Lynn, David G. Mann, Richard M. McCourt, Leonel Mendoza, Øjvind Moestrup, Sharon E. Mozley-Standridge, Thomas A. Nerad, Carol A. Shearer, Alexey V. Smirnov, Frederick W. Spiegel, Max F. J. R. Taylor: The New Higher Level Classification of Eukaryotes with Emphasis on the Taxonomy of Protists. In: The Journal of Eukaryotic Microbiology. 52 (5), 2005; Seiten 399-451 (Abstract und Volltext)
• Michael D. Guiry, G.M Guiry: Chlorophyta In: Algaebase - World-wide electronic publication, National University of Ireland, Galway, abgerufen 21. April 2012 (Abschnitt Systematik)

Weblinks

 Commons: Chlorophyta – Sammlig vo Multimediadateie

Dä Artikel basiert uff ere fräie Übersetzig vu dere Version vum Artikel „Chlorophyta“ vu de dütsche Wikipedia. E Liste vu de Autore un Versione isch do z finde.