Christoph Graf (Schwizergarde)
Christoph Graf (* 5. September 1961) isch sit em 7. Februar 2015 de 35. Kommandant vo de Päbstliche Schwizergarde im Vatikan.
De Christoph Graf isch am 2. März 1987 i d Schwizergarde iiträtte.[1] Er hät sich i de Garde vom Hellebardier zum Underoffizier ufe gschaffed. Isch dänn Usbildner vo de Gardischte gsii und hät as Fäldwaibel d Dienschtplän gmacht. Dänn isch er Hoptma vom dritte Gschwader worde. Am 6. Oktober 2010 isch de Christoph Graf vom Pabst Benedikt XVI. zum Vizekommandant vo de Garde ernennt worde.[2] Als Vizekommandant vo de Schwizergarde isch de Graf erste Beroter vom Kommandant und Verbindigsoffizier noch usse gsii.[3] Endi Januar 2015 hät er s Interims-Kommando vom bishärig Kommandant, em Daniel Anrig öbernoo, wil dä im Dezember 2014 sin Rücktritt per Endi Januar 2015 erchlärt hät. Wil dä Übergang nöd notloos öber d Bühni gange isch, hät s Medie gee, wo spekuliert händ, öb ächt de Pabst Franziskus d Garde wöli uflööse. De Christoph Graf hät die Grücht aber zrugg gwise.[4] Als Kommandant vo de Schwizergarde hät de Christoph Graf de militärisch Grad vom e Oberst.[5]
De Christoph Graf isch Bürger vo Pfaffnau, verhüroted und Vater vo zwai Chind.
Fuessnoote ändere
- ↑ Vom Hellebardier zum Kommandanten - Christoph Graf neuer Kommandant (Memento vom 9. Februar 2015 im Internet Archive) uf schweizergarde.ch, abgruefe am 19. Februar 2015
- ↑ Luzerner wird Vize-Kommandant der Garde (Memento vom 7. Februar 2015 im Internet Archive) Neue Luzerner Zeitung, Mittailig vom 11. Oktober 2010
- ↑ Neuer Kommandant der Schweizergarde Mittailig vo Radio Vatikan am 7. Februar 2015
- ↑ Neuer Kommandant: Keine Rede von Auflösung der Schweizergarde Mittailig vo Radio Vatikan am 8. Februar 2015
- ↑ Organigramm uf de Website vo de Schwizergarde, abgruefe am 25. Februar 2015