Dansk Folkeparti

Die Dänisch Volksbartei, uf Dänisch Dansk Folkeparti, abkürzt DF, isch a rächtspopulistischi Bardei z Dänemark. Die hütigi DF het nüt diräkt mit dr faschistische Dansk Folkeparti vo 1941 z due.

Dr Bresidänt vo dr Bardei, dr Kristian Thulesen Dahl

Dr Kristian Thulesen Dahl isch dr Bresidänt vo dr DF. D Bardei isch EU-kritisch iigstellt und befürwortet strängi Integrazions- und Iiwanderigsgsetz.

Gschicht

1995 si d Pia Kjærsgaard, dr Kristian Thulesen Dahl und anderi us dr Dänische Fortschrittspartei usdräte und häi die Dänisch Volksbardei gründet. 2005 won e Karikatur vom Mohammed in ere dänische Zitig erschiine isch und e Wälle vo Protest in dr muslimische Wält usglööst het, het d DF gforderet, as alli Muslime us Dänemark usgschafft wurde. D DF het bis 2011 d Regierig vom konservative Minischterbresidänt Rasmussen unterstützt, wo am 15. September 2011 abgweelt worde isch. In dene Waale het d DF 12,3 Brozänt vo de Stimme überchoo, 2015 si s scho 21,1 Brozänt gsi. 2019 het si aber viili Stimme verloore und isch numme no uf 8,7 % Brozänt choo; doodermit isch si aber allewiil no di drittsterchst Fraktion im Folketing.