Das Leben ist ein listiger Kater

Das Leben ist ein listiger Kater, dr franzöösisch Originalditel isch Bon Rétablissement, isch e Roman vo dr franzöösische Schriftstellere Marie-Sabine Roger (* 1957), wo im Joor 2012 bi Éditions du Rouergue uusechoo isch.

Inhalt

E Bangsionäär, dr Pierre, wo s vorziet, für sich sälber z lääbe, wird vom ene Auti überfaare und in d Seine gschlöideret, won er si Maudi isch go sueche. Er wacht schweer verletzt im Spiddaal uf, und s ganze Choo und Goo stöört en seer. Won e jungs Mäitli uusefindet, ass er e Kompiuter het, chunnt si immer wider zum dä bruuche, ooni sich drum z kümmere, ass em Maa das gar nid gfallt. Im Lauf vo dr Rehabilitazioon chunnt au e junge Maa verbii, won em verzelt, ass äär in us dr Seine gfischt häig. Wo uusechunnt, ass dä jung Maa dört uf em Strich gsi isch, zum si Studium chönne zaale, regt sich dr Pierre seer über das uf. Er findet sich aber schliesslig drmit ab und säit sim Retter, ass er e groossi Woonig häig und laadet en ii, zu iim cho woone.

S Buech isch vom Jean Becker verfilmt worde. Dr Film isch im Joor 2014 uusechoo.