Despotat Epirus

S Despotat Epirus isch äine vo de griechische Noochfolgerstaate vom Byzantinische Riich gsi, wo noch em Vierte Chrüzzuug noch 1204 entstande si. Dr Staat het bis zum Ändi vom 14. Joorhundert existiert. D Kärngebiet vom Fürstedum si d Region Epirus gsi, won em Staat dr Naame gee het, und Akarnanie. D Gschicht vom Staat isch brägt vo ständige Usenandersetzige mit de bedütendere Regionaalmächt uf em Balkan, em Byzantinische Riich, wo wider am Ufstiig gsi isch, und Bulgarie, spööter denn mit Neapel und Serbie, wo alli brobiert häi, iire Machtberiich uf Epirus uszdeene. Epirus isch schliesslig in e Hufe äinzelne Herrschafte verfalle, und isch zwüsche 1386 und 1449 schrittwiis ins Osmanische Riich iigliideret worde.

D Staatewält vo dr Romania noch em 4. Chrüzzuug 1204

D Bezäichnig Despotat Epirus für dä westgriechisch Staat isch nid historisch und wird in zitgenössische Kwelle nid brucht, wil dr Ditel Despot öbber bezäichnet, wo e Blatz in dr Hierarchii vom byzantinische Hoof ghaa het. Epirus isch aber immer unabhängig vom Kaiserriich Nikaia bzw. em restaurierte Byzantinische Riich gsi. Mäistens häi sich d Regänte Archon oder äifach Kyrios (Heer) gnennt. Noch 1230 häi aber äinzelni Herrscher vo Epirus dr Despoteditel vom Kaiser überchoo.

Litratuur

• John V.A. Fine: The Late Medieval Balkans: A Critical Survey from the Late Twelfth Century to the Ottoman Conquest. University of Michigan 1994. ISBN 0-472-08260-4.
• Donald M. Nicol: The Despotate of Epiros (1204–1267). Oxford 1957.
• Donald M. Nicol: The Last Centuries of Byzantium, 1261–1453. 2. Aufl., Cambridge 1993.
• Günter Prinzing: Studien zur Provinz- und Zentralverwaltung im Machtbereich der epirotischen Herrscher Michael I. und Theodoros Dukas (2 Teile). In: Epeirotika Chronika Band 24(1982), S. 73–120 und Band 25(1983), S. 37–112.
• Brendan Osswald: The Ethnic Composition of Medieval Epirus. In: St.G. Ellis, L. Klusakova (Hrsg.): Imagining Frontiers – Contesting Identities. Pisa 2007, ISBN 978-88-8492-466-7, S. 125–154.

Weblingg

• Griechenland im Mittelalter und in der Neuzeit. Zweite Periode: Fränkische Zeit. Von der Eroberung Konstantinopels durch die Kreuzfahrer … (1204–1460). In: Allgemeine Encyklopädie der Wissenschaften und Künste, hrsg. v. Johann Samuel Ersch & Johann Gottfried Gruber, Teil 85 S.200 ff. & Teil 86 S. 1–190.

Dä Artikel basiert uff ere fräie Übersetzig vum Artikel „Despotat_Epirus“ vu de dütsche Wikipedia. E Liste vu de Autore un Versione isch do z finde.