Dr Glood

Dialäkt: Baseldütsch

Dr Glood (* 12. September 1952) isch e Baselbieter Leerer und Schansonniee.

Lääbe und Wärk

Dr Glood, mit bürgerligem Naame Claude Mesmer, isch z Basel uf d Schuel gange. Er het dr Leerer gmacht und schafft as Brimaarschuelleerer.

Er isch Sänger und Gitarrist in dr Classic-Rock Bänd „Lapislazuli“ gsi und het sälber Lieder uf Änglisch und Dütsch gschriibe und komponiert, isch ufdräte und het am Radio gsunge. Er spiilt au klassischi Gitarre, het sich as Sänger usbildet und het aagfange, Mundartlieder uf Baseldütsch z singe. Er het en ersti Zeedee Aaneluege uusegee, e Kultuurförderbriis überchoo und e zwäiti Zeedee gmacht, Irgendwenn. Er isch mit em Aernschd Born und em Markus Heiniger in Trouba-Tour de Bâle ufdräte und mit em Heiniger in Aerdbeebe. Anderscht isch e Solobrogramm mit politisch-satirische Lieder gsi. Mit em Max Mundwiler und em Markus Heiniger het er BL SongPoetry ufgfüert und het in ere Bänd mit em Martin von Rütte (p voc), em Eric Rütsche (dr) und em Matthias Ammann (b) gspiilt. Si dritti Zeedee isch Galaxie gsi.

Er isch äine vo de Gründer vo dr Liederlobby gsi, wo sich für s Schwizer Mundartlied iisetzt.

Kwelle

• Porträt uf drglood.ch

Weblingg

• Liederlobby
• Alte Eidgenossen und junge Schweizer: dr Glood – “Irgendwenn” uf liederlobby.ch