Die drizää Kolonie

die drizää nordamerikanische Kolonie vo Groossbritannie, wo sich 1776 unabhängig gmacht und die Veräinigte Staate vo Amerika bildet häi

As die Drizää Kolonie wärde die britische Kolonie in Nordamerika bezäichnet, wo sich 1776 in dr Unabhängigkäitserkläärig vo de Veräinigte Staate vom Mueterland Groossbritannie drennt häi. Anderi britischi Bsitzige in Nordamerika, wie die früeneri franzöösischi Kolonii Québec und d Kolonie vo Nova Scotia und Prince Edward Island si dr britische Chroone dröi bliibe und si spööter as Kanada veräinigt worde. D Kolonie vo Ostflorida und Westflorida si wääred em amerikanische Unabhängigkäitschrieg ebefalls loyal bliibe.

1775 het s Köönigriich Groossbritannie Aaspruch uf d Hohäit über die rote und rosa Gebiet uf dere Charte erhoobe und Spanie het über s orangsche Gebiet westlig vom Mississippi River gherrscht. Die rooti Fleche isch s Gebiet vo de drizää Kolonie noch dr Broklamazioon vo 1763.

D Legände verzelt, ass e gwüssi Betsy Ross die ersti Faane vo de Veräinigte Staate mit 13 Stärn und 13 Sträife gnäit häig, äi Stärn und äi Sträife für jedi vo de 13 Kolonie.

Die Drizää Kolonie ändere

Zitgenössischi Dokumänt liste d Kolonie fast immer in ere geografische Räijefolg uf, zum Bischbil vo Norde uf Süüde, wie s au unde aagee isch (d Iidäilig in drei Regione isch e spööters Konstrukt vo Historiker):

  1. Nöiängland
    1. d Browinz New Hampshire, s spöötere New Hampshire
    2. d Browinz Massachusetts Bay, die spöötere Staate Massachusetts und Maine
    3. d Kolonii Rhode Island und Providence Plantations, s spöötere Rhode Island
    4. d Kolonii Connecticut und New Haven, s spöötere Connecticut
  2. Middleri Kolonie
    1. d Browinz Nöi York, die spöötere Nöi York und Vermont
    2. d Browinz New Jersey, s spöötere New Jersey
    3. d Browinz Pennsylvania, s spöötere Pennsylvania
    4. d Kolonii Delaware (vor 1776, die Undere Countys am Delaware as Nääbeland vo Pennsylvania), s spöötere Delaware
  3. Südligi Kolonie
    1. d Browinz Maryland, s spöötere Maryland
    2. d Kolonii Virginia, die spöötere Virginia und West Virginia
    3. d Browinz North Carolina, s spöötere North Carolina
    4. d Browinz South Carolina, s spöötere South Carolina
    5. d Browinz Georgia, s spöötere Georgia

Die 13 Kolonie entspräche 16 vo de 50 Bundesstaate vo de USA, wo s hüte git.

Weblingg ändere

  Commons: Die drizää Kolonie – Sammlig vo Multimediadateie