Dryops

De Dryops (altgriech. Δρύοψ „Aichemaa“) isch i de griechische Mythologii de Eponym vom Volch vo de Dryoper. Er isch de Soo vom Flussgott Spercheios und vo de Polydora oder noch anderne Quelle de Soo vom Gott Apollon und vo de Arkaderin Dia. Die söll en inere Aiche (altgriech. δρῦς, drys) versteggt haa.

De Dryops isch i de messenische Stadt Asine vereert wore und het dai e Tempel mitere Statue ghaa. Er isch mengisch au uf de asinäische Münze abbildet wore.