S Fischerhuus Bürgi
Koordinate: 47° 35′ 6″ N, 7° 35′ 31,1″ O; CH1903: 611536 / 270490
| Dialäkt: Baseldütsch |
S Fischerhuus Bürgin isch e Geböid im Basler Kwardier Kläihünige.
Öbbe vo 1690 aa wäiss mä von ere Fischerfamilie Bürgin z Kläihünige, wo wääred Generazioone as Fischer gschafft het. 1764 und 1765 het mä s Fischerhus an dr Schuelgass baut und 1804 e Stall mit ere Schüüre draabaut. Es het d Adrässe „Schuelgass 27“ überkhoo. Wääred dr Industrialisierig isch d Schuelgass kürzer gmacht worde und mä het d Verbindig vo dr Dorfstrooss zum Huus überbaut. Eso isch s Huus isoliert zmidzt under Industriigeböid gstande und mä het sich afo überleege, öb s nid sött abgrisse wärde.
1999 isch d Stifdig pro Fischerhuus Schuelgass 27 gründet worde. Iir Ziil isch s gsi, s Huus an en andere Blatz z Kläihünige z versetze und für d Zuekumft z rette. Si het Spände vo Brivatpersone, Undernääme und Stifdige überkho und iir Kaptal isch uf 800'000 Franke gwaggse. No im gliiche Joor het mä s Huus afo abbaue und het s im Joor 2000 am Übergang zwüschen em Wiilerwääg und dr Bonergass bzw. bim Clavelguet sorgfältig wider ufbaut. Mä het sich drbii Müe gee, die alte Material wie Bruchstäimuurwärk, Sumpfchalchmörtel, Hölzer wo mit Beijeli zrächtgschnitte worde si, Wanddääfeli wo vo Hand gmacht gsi si, e Kacheloofe zum Häize und alti Dachziegel wider z bruuche. Hüte wird s Huus für Veraastaltige wie Bankett, Seminar, Sitzige, Vordrääg und kulturelli Veraastaltige gnützt. Für Grubbe git s Füerige dur s Huus, wo drbii Gschichte verzelt wärde us dr Zit, wo mä im Rhii no Laggs gfischt het.
Weblingg
ändere
|
Dä Artikel basiert uff ere fräie Übersetzig vu dere Version vum Artikel „Fischerhaus_Bürgin“ vu de dütsche Wikipedia. E Liste vu de Autore un Versione isch do z finde. |