Gottlieb Muffat

Dr Gottlieb (Theophil) Muffat (* dauft 25. April 1690 z Passau; † 9. Dezämber 1770 z Wien) isch en östriichische Organist und Komponist gsi.

Lääbe

Dr Gottlieb Muffat isch e Soon vom Komponist Georg Muffat, und het woorschinlig vo sim Vater si erste Muusigunderricht überchoo. Noch em Dood vom Vater het er sich z Wien niidergloo, wo si Brueder Franz Georg Muffat (1681–1710) vo 1701 aa as Kammermusiker in dr Hofkapälle aafstellt gsi isch. Z Wien isch er Hofscholar (Schüeler vo dr Hofkapälle) worde, won er Schüeler vom Johann Joseph Fux gsi isch.

Im Joor 1717 isch er vom Karl VI. zum kaiserlige Hof- und Kammerorganist ernennt worde. Er het de Chinder vo dr kaiserlige Familie Muusigunderricht gee, drunder au dr spöötere Kaisere Maria Theresia. 1729 isch er zum zwäite Organist ernennt worde und 1741 zum Hoforganist. 1764 isch dr Muffat mit ere aaseenlige Jooresbangsion vo 900 Gulde bangsioniert worde. Zu sine Schüeler het höggstwoorschinlig au dr Georg Christoph Wagenseil ghöört.

Wärk

Dr Muffat het vor allem Komposizioone für Orgle und Dschembalo gschriibe, drunder e Hufe Fuge und Tokkate. Sinu Komposizioonen für s Dschembalo si under em Ditel „Componimenti musicali“ (1739) erschiine. Usserdäm het er e „Salve regina“, e „Sonata pastorale“ und 3 Dschembalokonzärt komponiert, won er din Elemänt vom modärne galante Stil verwändet het.

Im Joor 1940 isch in Wien-Meidling (12. Bezirk) d Muffatgasse noch iim benennt worde.

Litratuur

Ernst Hintermaier: Muffat, Gottlieb. In: Neue Deutsche Biographie (NDB). Band 18, Duncker & Humblot, Berlin 1997, ISBN 3-428-00199-0, S. 567 f.
Philipp Spitta: Muffat, Gottlieb. In: Allgemeine Deutsche Biographie (ADB). Band 22, Duncker & Humblot, Leipzig 1885, S. 443.
Constantin von Wurzbach: Muffat, Gottlieb. In: Biographisches Lexikon des Kaiserthums Oesterreich. Bd 19. Verlag L. C. Zamarski, Wien 1856–1891, S. 447 (uf Wikisource).

Weblingg

Digitalisat der Componimenti Musicali per il Cembalo (Site cha nüme abgrüeft wärde; Suche im Webarchiv)[1] [2] (Supplement-Band vo dr Händel-Wärkusgoob, uusegee vom Friedrich Chrysander, Leipzig 1896)
Gmeinfreji Note vu Gottlieb Muffat im International Music Score Library Project

Dä Artikel basiert uff ere fräie Übersetzig vum Artikel „Gottlieb_Muffat“ vu de dütsche Wikipedia. E Liste vu de Autore un Versione isch do z finde.