Hanns-Christof Spatz

Dr Hanns-Christof Spatz (* 17. Novämber 1936 z Potsdam; † 10. Augschte 2017) isch e dytsche Biofisiker un Brofässer vu dr Fakulteet fir Biology vu dr Uniwersiteet Fryburg gsii.

Lääbe

Dr Spatz het vu 1957 bis 1965 an dr Uniwersiteet Göttingen un dr FU Berlin Fisik studiert un isch no dr Diploomaabret und dr Dokteraarbet am Max-Planck-Inschtitut fir fisikaalischi Chemy unter dr Laitig vum Manfred Eigen anne 1965 bim sällem mit ere Aarbet iber s kineetisch Verhalte vu Brotoone un Deuteroone in Yyskrischtall bromewiert woore.

Derno het er vu 1965 bis 1968 as Postdoctoral Fellow an dr Stanford University un an dr Yale University gfoorscht. No syre Ruggcheer us dr USA het er vu 1968 bis 1971 am Max-Planck-Inschtitut fir Molekulaari Geneetik z Berlin in dr Abdailig vum Thomas A. Trautner gschafft, zeerrscht as Assischtänt, speeter as wisseschaftlige Mitarbaiter, wun er wiichtigi Erkänntnis zum Foorschigsbiet vu dr Bakteeriegeneetik byydrait het.

Anne 1972 het dr Spatz e Ruef an dr nei gschaffe Leerstuel fir Biofisik am Inschtitut fir Biology III vu dr Uniwersiteet Fryburg iiberchuu, wu sy Hauptinträssi zeerscht dr Biofisik un dr Neirobiology gulte het, doo bsundersch dr Foorschig an molekuleare Mechanisme vum Leere un vum Gedächtnis. Sy zäntraale Modällorganismus isch Drosophila melanogaster gsii.

In dr spoote 1980er Joor het er sy Foorschig uf d Biomechaanik vu Bflanze griichtet. Zämme mit em Thomas Speck het er d Plant Biomechanics Group an dr Uniwersiteet Fryburg grindet. Är het zue verschiidene Teemene us dr Bflanzebiomechaanik Publikazioone gschriibe, unter anderem iber s Knicke vu hoole Stämm, di staatisch un dinaamisch Belaschtig vu Baim, d Mechaanik vu Bflanzegwääb un au iber d Mechaanik vu fossiile Bflanze. Dr Spatz isch Laiter vum Kompetenznetz Biomimetik am Bioloogische Inschtitut vu dr Uniwersiteet Fryburg gsii, wun er zämme mit em Speck gfoorscht het. D Fryburger Brojäktgruppe het unter anderem entdeckt, wie Greeser, Bambus un Chatzewaadel mit weenig Materiaal e ranke Stängel bilde, wu ainewääg e hoochi Feschtigkait het.

Sy Opus magnum isch s Leerbuech Plant Physics, wun er 2012 zämne mit em Karl Niklas publiziert het.

Schrifte

• mit em Wolfgang Laskowski un em Wolfgang Pohlit: Biophysik I. Struktur, Energie, Information und Bausteine belebter Systeme. Thieme, Stuttgart 1974, ISBN 3135024016.
• mit em Georg Hertting (Hrsg.): Modulation of Synaptic Transmission and Plasticity in Nervous Systems. NATO ASI Series. Springer, Berlin 1988.
• mit em Thomas Speck: Plant Biomechanics 2000: Proceedings of the 3rd Plant Biomechanics Conference Freiburg-Badenweiler. Thieme, Stuttgart 2000.
• mit em Karl J. Niklas: Plant Physics. University of Chicago Press 2012.

Weblink

• Anja Geitmann, Karl Niklas, Thomas Speck: Plant biomechanics in the 21st century, Journal of Experimental Botany, Volume 70, Issue 14, 1 July 2019, S. 3435–3438