Dr Hatstetterhoof isch e historischs Geböid im Chläibaasel und befindet sich am Lindebärg 12 zwüsche dr Riechedoorstrooss, em Lindebärg und em Oobere Rhiiwääg. Es isch äins vo de bedütendste wältlige Baudänggmööler im Chläibaasel und stoot uf dr Liste vo de Baasler Kulturgüeter, wo für d Region vo Bedütig si. Hüte isch s Religions-pedagogische Zentrum vo bäide Baasel doo dehäi.
Uschnitt us dr Stadtaasicht vom Matthäus Merian em Eltere im 17. Joorhundert.[1] Rächts stoot dr Hatstetterhoof mit sine Dürmli und dr Muure drumume.
S Haupthuus, wo drei Stögg, vier Eggedürmli und e Stäägedurm an dr Südostfassaade het, isch 1501 uf em Areal von ere Ziegelei im Stiil vo dr oberrhiinische Spootgotik baut worde. Es isch e Herrschaftssitz mit ere Muure drum ume und isch under de chläine Altstadthüüser in dr Umgääbig uusegstande.
Vo 1576 bis 1585 het dr Hatstetterhoof em bekannte Söldnerfüerer Claus vo Hattstatt ghöört, und het däm si Naame bhalte. Bis ins 19. Joorhundert isch er in brivatem Bsitz gsi.[2]
1836 het die römisch-katholischi Gmäind s Haupthuus kauft und es as Schuelhuus und Pfarrhoof vo St. Clara brucht. Au d Liigeschaft am Lindebärg nääbedraa isch denn in d Händ vo dr Kiirche khoo.[3]
In de Joor 2003 bis 2005 isch dr Hatstetterhoof vo «Fierz Architekten» in änger Zämmenaarbet mit dr Baasler Bauforschig, dr stedtische Dänggmolpflääg und dr Kiirchegmäind zum ene «ökumenische Zentrum für Religionspedagogik und Medie» vo dr römisch-katholische und dr evangelisch-reformierte Kiirche vo bäide Baasel umbaut, saniert und restauriert worde. Sit dr Iiweijig am 2. Septämber 2005 betriibe jetz vier Kiirche us zwäi Kantön gmäinsam im Hatstetterhoof en ökumenischi Medieusleenstell.[3]
