Hermann Heidegger

Dr Hermann Heidegger (* 20. Augschte 1920 z Fryburg; † 13. Jänner 2020 z Stääge) isch e dytsche Hischtooriker un Offizier gsii un Noolossverwalter vum Filosoof Martin Heidegger, sym Stiefvater.

Lääbe un Wiirke

Anne 2005 het dr Hermann Heidegger im Noochwoort vu dr Briefsammlig »Mein liebes Seelchen!« Briefe Martin Heideggers an seine Frau Elfride, zum eerschte Mool effetli gmacht, ass dr Martin Heidegger nit sy lyyblige Vater isch, derfir dr Dokter Friedrich Caesar, e Juugedfrynd vu dr Elfride, wu anne 1946 gstoorben isch. Dr Martin Heidegger un d Elfride geb. Petri sin syter anne 1917 ghyroote gsii, dr Heidegger het d Vaterschaft akzeptiert ghaa.

Dr Hermann Heidegger het as beurlaubte Faanejunker zwai Semeschter Filosofy, Gschiicht, Räächtswisseschaft un Foorschtwiirtschaft studiert. Im Zweete Wältchrieg isch er as Infanteryoffizier viermool verwundet woore. Ab em Spootjoor 1941 het er zwai Joor lang as Rekonvaleszänt z Fryburg verbroocht, un het drei Vorlääsige un e Seminaar vu sym Stiefvater bsuecht. Anne 1945 isch er zum Oberleutnant befeerderet woore un Bataillonskommandeur in ere Volksgrenadier-Division. No dr Ruggcheer us dr sowjetische Chriegsgfangeschaft 1947 het er vu 1948 bis 1952 Gschiicht un Pedagoogik studiert un het derno bis 1955 as Volksschuelleerer gschafft. Anne 1953 het er bim Gerhard Ritter mit ere Dissertation iber s Theema Die deutsche Sozialdemokratie und der nationale Staat promoviert.

Im Joor 1955 isch dr Heidegger von Wolf Graf Baudissin as Hauptmann in s Verdaidigungsminischterium ghoolt woore, wun er an dr eerschte vier Bänd vum bolitisch-historische Handbuech Schicksalsfragen der Gegenwart gschafft het. Är isch au Mitgrinder vum dr Moonetsschrift Information für die Truppe gsii un het in e baar Generaalstaabs- un Druppekommandeursverwändige dient. Sy Abschiid het er anne 1979 as Ooberscht kriegt.

Noch em Dood vum Martin Heidegger anne 1976 isch er sällem sy Noolossverwalter woore un het no dr Gsamtuusgaab vum Filosoof gluegt. Är isch au ne Expert fir s Entziffere vu dr Manuskript vu sym Stiefvater gsii, wu in dytscher Kurräntschrift ghalte sin. Syter 2014 wird dr Nooloss vu s Hermann Heideggers Suun Arnulf Heidegger verwaltet.

Vu 1985 bis 2015 isch er Vorsitzer vum Kuratorium vu dr Martin-Heidegger-Gsellschaft gsii. Är isch Mitgliid u. a. vu dr Ranke-Gsellschaft, dr Clausewitz-Gsellschaft un dr Dytsche Schillergsellschaft gsii.

Schrifte

• Heimkehr 47. Tagebuch-Auszüge aus der sowjetischen Gefangenschaft. Edition Antaios, Schnellroda 2007, ISBN 978-3-935063-73-9.
• Die deutsche Sozialdemokratie und der nationale Staat: 1870–1920. Unter besonderer Berücksichtigung der Kriegs- und Revolutionsjahre. Musterschmidt, Göttingen 1956, zugleich Dissertation, Universität Freiburg i. Br., 1953, OCLC 722739155.

Weblink

• Martin-Heidegger-Gesellschaft
• „Er war ein lieber Vater“. Hermann Heidegger im Gespräch mit Iris Radisch. In: Die Zeit, 6. Meerz 2014.
• Bettina Schulte: Der Nachlassverwalter des Philosophen: Hermann Heidegger ist tot. In: Badische Zeitung, 20. Jänner 2020.

Fueßnote

Dä Artikel basiert uff ere fräie Übersetzig vu dere Version vum Artikel „Hermann_Heidegger“ vu de dütsche Wikipedia. E Liste vu de Autore un Versione isch do z finde.