Ääscheniöör

Ääscheniöör, Ingenieur [ɛ̃.ʒe.njœʁ] (Abchürzig Ing.) isch d Bruefs- und Standesbezäichnig für wüsseschaftlig usbildeti Fachlüt uf technischem Gebiet. Es git verschiideni Fachrichdige bi dr Usbildig vo Ääscheniöör und si wird an Hoochschuele mit eme akademische Graad abgschlosse.

Usbildig

Wie dr Ääscheniöör usbildet wird und wien er si Bruef usüebt isch in de Länder vo Öiropa zum Däil seer underschidlig greeglet. Näben em klassische Hoochschuelstudium an Uniwersidääte und Fachhoochschuele biete zum Bischbil z Ööstriich Hööcheri Technischi Leeraastalte (HTL) schuelischi Usbildigsgäng in technische Fachrichdige aa. Noch eme erfolgriiche Abschluss und ere fachbezogene Braxis, wo mindestens drei Joor lang goot und ghoobeni Kenntniss vorussetzt, daf mä denn d Standesbezäichnig Ääscheniöör bruuche. In dr Bundesrepublik Dütschland het s bis in d 1970er Joor an Fach-/ Ääscheniöörschuele und -akademie d Usbildig zum Ingenieur (grad) gee. Die Schuele si zuedoo worde und mä het Fachhochschuele mit dr Usbildig zum Diplomingenieur (HS) gründet. Wäge dr öiropäische Hochschuelreform, wo as Bolonia-Brozäss bezäichnet wird, si au d Bruefsbezäichnige für d Ääscheniöör gänderet worde: Bachelor of Engineering (B.Eng.) bzw. Master of Engineering (M.Eng.). Dr Master söll dr bishäärig Graad Diplomingenieur ersetze, wo ursprünglig nume vo dütsche und ööstriichische Technische Hochschuele und Technische Uniwersidääte vergee worde isch. Dr Bachelor isch öbbe ekwiwalänt zum Diplomingenieur (FH), er het aber weniger Grundlaagewüsse. Nume mit em Master oder em Diplomingenieur (Uni) cha mä zum Hööchere Dienst, wo die höggsti Laufbaan für Beamte in dr Bundesrepublik Dütschland isch.

Litratuur

Walter Kaiser, Wolfgang König: Geschichte des Ingenieurs. Ein Beruf in sechs Jahrtausenden. Carl Hanser Verlag, München u. a. 2006, ISBN 3-446-40484-8.
Horst Czichos, Manfred Hennecke (Hrsg.): Hütte – Das Ingenieurwissen. 33. aktualisierte Auflage. Springer, Berlin u. a. 2007, ISBN 978-3-540-71851-2.

Weblingg

Commons: Ingenieure – Sammlig vo Multimediadateie