Jesus with erection

Dr Jesus with erection isch e umstritteni satirischi Karikatur wo inre Studäntezitschrift an dr University of Oregon veröffentlicht worde isch. D'Karikatur het im Johr 2006 in de Verainigte Staate einigi Debattene uusglöst.

Karikatur

Uf dr vo Hand zaichnete Karikatur gseht me dr Jesus nackt ufem Chrüz mit ere Erekzion. In dr Studäntezitschrift sind no elf witeri vo Hand zaichneti Karikature vom Jesus abbildet worde, under anderem aini wo dr Titel Resurrection het, wome der nackti Jesus gseht, winer en andere nackte Jesus küsst, und baidi hend Erekzione.

Kontex

D'Studente hend argumentiert, si hegit welle Dialog provoziere nachdem sovil d'Muslime kritisiert hend nach der Kontroverse um Karikature vom Mohammed vom gliche Johr.

Das isch eso gsi: es paar Monet früeher het die dänischi Zitig Jyllands-Posten satirischi Karikature vom Mohammed, em höchste Profet vom Islam, veröffentlecht. Der Mohammed isch zum Bispil dargstellt worde mitemne Turban in Form vonere Bombe ufem Chopf; oder es isch dargstellt worde wine bätende Muslim vomene Hund "bestige" wird. Uf das abe hets (vorallem) in arabische Länder heftigi Protescht gäh: vili Muslime hend gsait dass die Karikature die Respektlosigkeit versinnbildliche, mit dere der "Weste" am Islam begägni. Botschafte vo westliche Länder (speziell dänischi Botschafte) si agriffe worde, e christlechi Nonne isch in Somalia ermordet worde.

Uf der aine Site hend sich vili Muslime diskriminiert gfühlt ob de Karikature vom Mohammed, uf de andere Site hend vili im Weste gseit, dass Journaliste in Europa frei sind, z'publiziere was si wänd, wenns ned Menscherecht verletzi; im Spezielle "Meinigsfreiheit" sig es fundamentals Menscherecht, wo in islamische Länder ned respektiert würdi.

Reakzione

Nachdäm d'Jesus-Karikature veröffentlecht worde sin, hand verschideni religiösi und konservativi Gruppierige in de USA verlangt, dassd Studente sich öffentlech entschuldige für d'Publizierig vo de Karikature, und dass d'Studentezitig nümme vo der staatliche Universität Oregon finanziert würdi. Dr Presidänt vo der Catholic League (katolische Liga), der William Donohue, het gsait, dass der Presidänt vo der Universität, der David B. Frohnmayer, sigi es Stück wit verantwortlech fürs "Debakel" wil er ned uf Kritike vo Site vo Gägner vo de Karikature iigange isch, und will er nüt unternoh hegi gege d'Veröffentlechig vo de Jesus-Karikature. Är het gseit, dass der Jesus with erection "eini vo "obzönschte" Agriff gäges Christetum isch woner je issim Läbe gseh het". Konservativi Zitige, gnauer gseit der The O'Reilly Factor, hend verlangt, dass der Presidänd vo der Uni, der David Frohnmayer, sis Amt ufgit. Uf der andere Site händ der Oregon Daily Emerald und der Oregon Commentator, zwei Zitschrifte wo vo dr Uni finanziert wärde, öffentlech z'Rächt für freii Meinigsüsserig vo de Studente vertaidigt. Si hend au, basierend ufemne Urteil vom Oberste Gricht vo de USA (Fall Southworth vo 2006), befürwortet, dass der Frohnmayer entschide het, di kontroversi Zitschrift witerhin z'unterstütze..

Linggs

• Karikature vom Jesus mit ere Erekzion, PDF, i der Studäntezitig "The Insurgent".