Johann Friedrich Lampe

Dr Johann Friedrich Lampe (anglisiert John Frederick Lampe; * 1703 vermuetlig z Saggse; † 25. Juli 1751 z Edinburgh) isch e dütsch-britische Komponist und Fagottist gsi.

Lääbe und Wärk

Über d Jugend vom Lampe und si Usbildig wäiss mä nume weenig. Er het offebar Bezieige zur Katharine-Schuel z Braunschweig ghaa; noch äigene Aagoobe het er z Helmstedt Muusig studiert.

Im Joor 1725 isch dr Lampe uf London gange, und isch as Fagottist im King’s Theatre aagstellt worde, wo zu sällere Zit fast alli (italiänische) Opere vom Georg Friedrich Händel ufgfüert worde si. Es isch erwiise, ass er au s Doppelfagott gspiilt het, wo dr Thomas Stanesby Jr. für e Händel baut het.

Vo 1730 aa het dr Lampe für e John Rich (1692–1761) d Muusig zu de Pantomime am Theater Covent Garden gschriibe, 1732 si ersti Opere uf Änglisch Amelia mit em Libretto vom Henry Carey. Mit Carey zämme het er au 1737 d Opereparodii The Dragon of Wantley, wo si erfolgriichsts Wärk worde isch und mee zitgenössischi Uffüerige erläbt het as im Gay si Beggar’s Opera. E Fortsetzig, Margery, or A Worse Plague than the Dragon, het weeniger Erfolg ghaa. Dr Lampe het witer komischi und satirischi Opere für Covent Garden gschriibe, so 1745 e Verdoonig vom Shakespeare sinere Version vo Pyramus und Thisbe. 1740 het si musikalischi Pantomime Colombine courtezan, wo d Kitty Clive dr Teggst drfüür verfasst het, am Theatre Royal, Drury Lane z London Erfolg ghaa.

1738 oder 1739 het dr Lampe d Sängere Isabella Young ghürootet, won e Schwöögere vom Thomas Arne gsi isch, won er mit em an e baar Konzärt gschafft het. 1740 isch iire Soon Charles John Frederick Lampe uf d Wält choo, wo denn sälber Komponist und Organist worde isch. Er isch mit sinere Familie uf meereri Turneä gange. 1748/49 si d Lampes z Dublin gsi, 1750 si si vo dört uf Edinburgh. Dört isch dr Lampe am ne Fieber gstorbe und uf em Canongate Churchyard begraabe worde.

Dr Lampe het sich uf Parodie uf Änglisch konzentriert, wo dr italiänisch Operebetriib, wo früener erfolgriich gsi isch, parodiert häi und dr Gattigsnaame Burlesque Opera oder Mock Opera überchoo häi. Er het au d Muusig für meereri Pantomime und e baar Schauspiil komponiert. Fast für 30 Büünestück het er d Muusig verfasst, usserdäm e Traversflötekonzärt The Cuckoo, verschidnigi religiöösi Hümne (under anderem uf Teggst vo sim Fründ Charles Wesley) und e Hufe Lieder.

Litratuur

Friedrich Blume (Hrsg.): Die Musik in Geschichte und Gegenwart. Band 8. Münche, Kassel u. a. 1989, ISBN 3-423-05913-3, S. 151f.

Weblingg

Liste vo de Büünewärk vo Johann Friedrich Lampe uf dr Basis vo dr MGG (Die Musik in Geschichte und Gegenwart) bi Operone
Gmeinfreji Note vu John Frederick Lampe im International Music Score Library Project
Duett us The Dragon of Wantley us ere ööstriichische Uffüerig z Hälfebärg bi Youtube

Dä Artikel basiert uff ere fräie Übersetzig vum Artikel „Johann_Friedrich_Lampe“ vu de dütsche Wikipedia. E Liste vu de Autore un Versione isch do z finde.