Julirevolution

D Julirevolution, oder die französischi Revolution vo 1830 isch ä bürgerlichi Revolution gsi, wo as Ziil gha het, die reaktionäri Politik vom Bourbonekönig Charles X., wo vorgha het s Bürgertum z entmachte, mit erä liberale z ersetze. In ihrem Verlauf isch dr Charles X. abgsetzt und vo siim Cousin, em Louis-Philippe vo Orléans as König ersetzt worde. Frankriich isch ä konstitutionelli Monarchii bliibe, aber s Prinzip vo dr Souveränitet vom Volk, understützt vo de so-genannte Orleaniste, het über die erblige Rächt vo dr Monarchi, wo d Legitimiste uf ihri Fahne gschriibe hai, gsiigt.

D Freiheit wo die Revolutionäre aafüehrt, vom Eugène Delacroix.

Verlauf

D Revolution isch am 26. Juli 1830 usbroche, nochdäm die königlichi Regierig die so-genannte „Juliordonnanze“ veröffentligt het, wo s Parlamänt ufglöst und d Meinigsfreiheit iigschränggt hai. Am 27. Juli si z Paris Barrikade baut worde und drei Dag spöter het dr Charles X. abdanggt und isch ins Exil noch Ängland gange. Die Bürgerliche hai d Macht fest in d Hand gnoh, und Unruehe unter em Proletariat unterdruckt.