Karl Walker
Dr Karl Walker (* 4. Jänner 1904 z Strassburg; † 5. Dezämber 1975 z Berlin) isch e dütsche Soziaalwüsseschafder u Bolitiker gsii. Sis Pseudonym isch Carl Heinrich gsii.
Churzi Biografii
ändereDr Walker hed e Leer as Buechbinder gmachd u hed sälber (aso ooni ane Uni z gah) Volkswirtschafdsteorii glernt. Wärend dr Naziziit z Dütschland hed er e chliini Firma für Füürschutzaaschdrich gha, won er bis zu 40 Aagschdellti gha hed. Mit verschidnige n Ökonome hed er Briefkontakt gha; unger dene isch o dr John Maynard Keynes gsii.[1]
Nach 1938 het sech, drotz däm dass d Nazis d Freiwirtschaftsbewegig verbotte hei, e sognennte Freiwirtschafdleche Arbets–chreis zämetäa, wo näbem Otto Lautenbach u em Franz Hochstetter o dr Karl Walker derzue ghört hed. Zäme hei si 1943 u 1944 es Sofortbrogramm zur finanzielle u wirtschafdleche Überwindig vo de Chriegsfolge uf d Bei gschdellt, wo nach em Chrieg de n Aahänger vom Silvio Gsell as Baasis für iri Dätigkeite ghulfe hed: si hei alli Forme vo schdaatlecher Zwangswirtschafd welle n uufbräche.[2]
Nach em Zwöite Wältchrieg het dr Walker as Verlaagslektor z Bayern afo schaffe u hed brobiert, ds Schwiizer Modäll vor WIR Bank (Wirtschaftsring) z Dütschland iizfüere.[3] Är isch Schrifdleiter vor Ziitschrifd Die Gefährten: Monatsschrift für Erkenntnis und Tat gsii, wo vo 1946 bis 1950 vom Rudolf Zitzmann usegää worde n isch. 1952 isch dr Walker Mitgliid im Vorschdand vom Freiwirtschaftsbund worde; de isch er no Mitbegründer vor Sozialwüsseschafdleche Gsellschafd gsi.[4] Um sech über Wasser z halte hed er i de Füfzger Jaar as Gschäfdsfüerer vo re Seilbahn gschaffed. De isch er no Schdatraat für di Sozialdemokratischi Bartei vo Dütschland gsi u hed i de Sächzger Jaar es volkswirtschafdlechs Schbiili kreíert (ds sogenannte Walker-Modäll), wo uf ere Erfindermäss z Brüssel e Brongssemedallie gwunne hed.[5]
Dr Walker isch e kritische Schüeler vor Freiwirtschafdsleer vom Silvio Gesell gsi.[6] Är hed zum Biischbil ir Kapitalismus-Diskussioon, angers as dr Gsell sälber, dr Kapitalismus as es „Wirtschaftssyschdeem, wo in erschder Linie uf d Erziilig vo Kapitalerdraag uusgrichded isch“, aagluegt. D Überwindig vom Kapitalismus klapped - wi dr Walker meint - nume wemme s Rentabilitätsbrinzip cha befreie. Dä Leitgedanke hed er ab 1936 immer wiiter düredänkd.
Literatuur
ändere- Ekkehard Lindner (Heruusgäber): Einsam geblieben bei der Wahrhaftigkeit. Gedänkschrifd zum Dood vom Karl Walker. Chr. Gauke Verlaag, Lütjeburg 1976, ISBN 3-87998-507-3. Mid Biiträg vom Tristan Abromeit, vom Felix G. Binn, vom Hans Doerner, vom Hans Hoffmann, vom Claas-Hermann Jannssen, vom Ekkehard Lindner, vom Hanns Linhardt, vom Karl Walker sälber u vom Hans Weitkamp.
Kwälle
ändere- ↑ Einsam geblieben bei der Wahrhaftigkeit. Gedänkschrifd zum Dood vom Karl Walker. Chr. Gauke Verlag, Siite 16. ISBN 3-87998-507-3.
- ↑ Günter Bartsch: Anarchismus in Deutschland. Band I: 1945 - 1965. Hannover, 1972, Siite n 81.
- ↑ Einsam geblieben bei der Wahrhaftigkeit. Gedänkschrifd zum Dood vom Karl Walker, Chr. Gauke Verlag, Siite 15. ISBN 3-87998-507-3
- ↑ Günter Bartsch: Die NWO-Bewegung Silvio Gesells. Teil 3, III: Institutionen für Forschung und Bildung
- ↑ Werner Onken: Modellversuche mit sozialpflichtigem Boden und Geld. Kapitel 4: Die Bedeutung wirtschaftlicher Experimente für Gegenwart und Zukunft. Fachverlag für Sozialökonomie, Lütjenburg 1997. ISBN 3-87998-440-9
- ↑ Ekkehard Lindner: 50 Jahre Sozialwissenschaftliche Gesellschaft 1950 e. V. (Memento vom 19. Juli 2011 im Internet Archive)
|
Dä Artikel basiert uff ere fräie Übersetzig vum Artikel „Karl_Walker“ vu de dütsche Wikipedia. E Liste vu de Autore un Versione isch do z finde. |