Katharina Schulze

D Katharina Elisabeth Schulze (* 20. Juni 1985 z Fryburg) isch e dytschi Bolitkeri (Bindnis 90/Di Griene). Si gheert syt dr Landdagswahl 2013 em Bairische Landdag aa un isch syter anne 2017 aini vu dr baide Vorsitzerne vu dr Fraktion vu dr Griene. Bi dr Landdagswahl 2018 isch si Spitzekandidati gsii un het zäme mit em Ludwig Hartmann s Spitzeduo vu dr Griene bildet un isch mit sällem zäme no dr Wahl Oppositionsfiereri im bayerische Landdag wore.

d Katharina Schulze (2013)

Lääbe

Härchumft, Studium un Beruef

Ufgwachsen isch Schulze z Herrsching am Ammersee, ihre Vater chunnt vu Berlin, ihri Mueter vu Fryburg. S Abitur het si im Juni 2005 am Christoph-Probst-Gimnasium z Gilching gmacht, wu si au Schuelersprächeri gsii isch. Vu 2005 bis 2011 het d Schulze an dr Universitet Minche Interkulturälli Kommunikation, Bolitikwisseschaft un Bsichology studiert. Vu Augschte bis Dezämber 2008 het si ne Uuslandssemeschter an dr University of California, San Diego, absolviert un e Praktikum bi dr Demokratische Bartei z Michigan gmacht. Ihre Studium het si 2011 mit em Titel Magister artium abgschlosse. In dr Zyt vum Studium het d Katharina Schulze no aigener Darstellig für verschideni Unternäme gschafft, u. a. Siemens, akzente kommunikation und beratung, Kienbaum, Ärzte der Welt, InWEnt - Internationale Weiterbildung. Vu Februar 2012 bis Septämber 2013 het si bi dr Gesellschaft für ökologische Forschung (GöF) z Minche gschafft un um des Zyt au as wisseschaftligi Mitarbaiteri in Dailzyt fir d Landdagsabgordnet Theresa Schopper un as interkulturälli Traineri.

Grienbolitikeri syt 2008

d Katharina Schulze im Bairische Landdag 2017

D Katharina Schulze isch anne 2008 dr Griene Juged byydrätte. Dert het si si vor allem im Umwält- un Klimaschutz engaschiert, aber au in dr Genderbolitik. Si isch vu Jänner 2009 bis Jänner 2011 Sprächeri vudr Griene Juged Minche gsii. Vu 2009 bis 2014 isch si Mitglid im Barteirot vu dr bairische Griene gsii un vu Novämber 2010 bis Mai 2015 Vorsitzeri vu dr Griene z Minche. Um die Zyt het si s gschafft, ass d Bundesbartei vu Bindnis 90/Die Griene d Bewärbig zue dr blante Olympische Winterspiil z Minche 2018 abglähnt het. Vu 2009 bis 2014 isch si Mitglid im Barteirot vu dr bairische Griene gsii un het dert Wahlkämpf un d Strukturreform vu dr Landesbartei mitgstaltet. Dr Mincher Griene isch si vu Novämber 2010 bis Mai 2015 vorgstande. Doderby het si si vor allem uf d Strukturreform vum griene Chraisverband Minche, d Organisation vu sechs Wahlkämpf, d Minchner Stadtbolitik un d Organisation un Dailnahm an dr Burgerentschaid zue dr 3. Startbahn vum Mincher Flughafe un NOlympia kunzäntriert. Syt ihre Wahl zue dr Fraktionsvorsitzeri isch d Katharina Schulze Mitglid im Landesuusschuss vum bairische Landesverband vu dr Griene. Des Gremium koordiniert di bolitische Aktivitete vum Landesverband un unterstitzt de Landesvorstand vu dr Bartei. 2018 isch d Katharina Schulze vu ihre Bartei in ere baiernwyte Urwahl mit 89,25 % zur Spitzekandidati gwehlt wore.

Abgordneti syt 2013

Bi dr bairische Landdagswahl vum 15. Septämber 2013 isch d Schulze in Landdag gwehlt wore. Si isch as Diräktkandidati im Stimmchrais München-Milbertshofen uf 13,6 % vu dr Eerschtstimme chuu un isch dodermit hinter dr Kandidatine vu CSU un SPD gläge. Noch em fimfte Blatz uf dr griene Lischt fir dr Wahlchrais Oberbaiern isch si mit dr Gsamtstimme schließli uf em sibte Blatz glandet un het dodermit dr Yyzug in Landdag gschafft. D Katharina Schulze isch bi dr konschtituierende Sitzig vum 17. Bairische Landdag am 7. Oktober 2013 zäme mit dr Judith Gerlach (CSU) as aini vu dr boode jingschte Abgordnete Schriftfiereri. Si isch stellverdrättendi Vorsitzeri un Sprächeri fir Inners, Sport un Strategie gege Rächtsextremismus vu dr griene Fraktion im Bairische Landdag. Si verdritt d Fraktion im Uusschuss fir kommunali Froge, Inneri Sicherhait un Sport un au im Uusschuss fir Verfassig, Rächt un Barlemäntsfroge, derzue im Kuratorium vu dr Hochschuel fir Bolitik Minche (HfP), im HfP Reformbyrot, im Landessportbyrot um im Barlemäntarische Kontrollgremium. Im Februar 2017 isch si zur Vorsitzeri vu dr Landdagsfraktion as Noofolgeri vu dr Margarete Bause gwehlt wore.

Zue dr bairische Landdagswahl 2018 isch d Katharina Schulze näb em Ludwig Hartmann as bairischi Spitzekandidati aadrätte un isch au uf dr griene Lischt fir dr Wahlchrais Oberbaiern uf Blatz Nr. 1 gstande. Bi dr Wahl am 14. Oktober 2018 het si in ihrem Stimmchrais Milbersthofen mit 34,9 % s Diräktmandat gwunne.

Bolitischi Positione un Kontroverse

D Katharina Schulze bresäntiert s Plakat zum Burgerentschaid 2012

Fir d Katharina Schulze stoht im Mittelpunkt vun ere griene Innebolitik, ass d Burgerrächt gwohrt blybe. Wäge däm setzt si si fir dr Schutz vu dr persenlige Freihait un d Privatsphäre vu dr Mänsche yy. Bindnis 90/Di Griene fordere im Bairische Landdag Ermittligsmethode, wu d Grundrächt schone, statt ere aalosslose Vorratsdatespycherig un mee Mitbstimmig. D Schulze forderet zum Byschpel d Absänkig vum Wahlalter uf 16 Johr. Glychzytig sott s bim Staat au z Baiern mee Transparänz gee dur e Transparänzgsetz, wu si in dr 17. Legislaturperiod in Landdag yybrocht ghaa het: Grieni Burgerrächtsbolitik isch fir d Katharina Schulze nume mit mee demokratischer Mitbstimmig meegli.

Dr Katharina Schulze ihre Schwärpunkt as Fraktionsvorsitzeri vu dr Griene im Bairische Landdag isch au s Thema Digitalisierig un di tächnisch un kulturäll Bedytig dervu. Fir sii isch d Digitalisierig e Chance fir die Zuechumft vu dr Bildig, dr Mobilitet, dr Energyversorgig un dr Gsundhait undr Bflääg, wu d Bolitik aber mitgoo mueß. Bindnis 90/Di Griene hän im Bairische Landdag kritisiert, ass dr Infrastrukturuusböu z langsam goot un ass wichtigi Froge vu dr Digitalisierig nit klert sin, zem Byschpel wie d mer d Suveränitet iber aigen Date cha bhalte un wie dr Mänsch cha autonom blybe, wänn di chischtli Intelligänz eso schnäll wytergoot.

D Katharina Schulze isch syt 2011 d Sprächeri vu München gegen die 3. Startbahn un het derzue bydrait, ass dr Burgerentschaid gege di dritt Startbahn am Flughafe Minche gwunne woren isch. Si engaschiert si gege di 3. Start- un Landebahn, wel si sait, ass mer die nit bruucht. S sei unumstritte, ass dr Chrach un d Abgas e großi Lascht fir Mänsch un Dier sin, un d Uuswytig vum Flughafe widerspricht ihre Mainig no dr Zyl vum Klimaschutz.

D Katharina Schulze isch d Sprächeri vu NOlympia München, eme Aktionsbindnis, wu si gege d Olympiabewärbige vu Minche 2018 un 2022 engaschiert het. Si het vor allem s intransparent IOC un s Sträbe no Kommerz un Profit statt eme Fokus uf dr Mänsch un dr Sport sälbscht kritisiert. In eme Burgerentschaid 2013 het s in Minche un au in drei andere bedroffene Gmaine ne Mee gege ne zwooti Bewärbig gee.

Im Dezämber 2013 het d Katharina Schulze zäme mit ihrem Kolleg Sepp Dürr zytwys e Dänkmol am Marstallplatz z Minche, wu „Den Trümmerfrauen und der Aufbaugeneration“ mit eme bruune Duech zuedeckt, wu d Uussag „Den Richtigen ein Denkmal, nicht den Alt-Nazis. Gegen Spaenles Geschichtsklitterung“ drufdruckt gsii isch. Die Aktion het e heftigti Debatte um d Ufböugeneration z Minche aagfyrt un d Frog, eb wirkli Fraue freiwillig di verwieschtet Stad´t noch em Chrieg ufgruumt hän oder nit ender zewangsverpflichteti Chriegsgfangeni un ehmoligi NSDAP-Mitglider.

Privatlääbe

D Schulze isch mit em griene Finanzminischter vu Baade-Wiirtebäärg Danyal Bayaz liiert. Im Juni 2021 sin d Schulze un dr Bayaz Eltere vun eme Bue woore.

Mitglidschafte

D Schulze isch Mitglid im Naturschutzbund Dytschland (NABU) un Ferdermitglid vu dr Antifaschistische Informations-, Dokumentations- un Archivstell Minche e. V. (a.i.d.a.).

Weblink

 Commons: Katharina Schulze – Sammlig vo Multimediadateie

• Biografy uf dr Syte vum Bairische Landdag
• Internetsyte vu dr Katharina Schulze
• Silke Lode: Machtzentrum am Küchentisch. Süddeutsche.de, 14. Merz 2011.
• Benjamin von Brackel: Unter den Wolken. der freitag online, 24. Juni 2012.
• Felix Müller: Noch lange nicht am Ziel. merkur online, 13. Augschte 2014.
• Felix Müller: Grünen-Chefin hört auf, Katharina Schulze: auf dem Weg nach oben. merkur online, 11. Mai 2015.

Fueßnote

Dä Artikel basiert uff ere fräie Übersetzig vu dere Version vum Artikel „Katharina_Schulze“ vu de dütsche Wikipedia. E Liste vu de Autore un Versione isch do z finde.