Kernkraftwerk Three Mile Island

S Chärnchraftwärk Three Mile Island (TMI) isch es AKW im US-amerikanische Bundesstaat Pennsylvania mit ursprünglech zwene Reaktor-Blöck vo je rund 900 Megawatt elektrischer Leischtig. Es isch i de 1970er Johr erbaut worde.

S Chärnchraftwärk Three Mile Island

Berüemt worde isch das AKW mit Druckwasser-Reaktore dürne Unfall im März 1979. Dür ne Verchettig vo technische Mängel und mönschleche Unzuelänglechkeite hets im Block 2 ne Chärnschmelzi gäh, wo zum Glück nur zun ere relativ chlinnere Freisetzig i d Umgäbig gfüehrt het. Genauer isch es Ventil, wo nur chürzer gäge ne Druck-Transiänte hätt sölle ufgoh, über ne längeri Zytschpanne offe blibe. S Personal, wo nit het chönne abläse, wie dr Wasserstand im Reaktor genau schtoht, hett gmeint, me chönni die automatisch aglaufni Notchüelig vorziitig wieder abschalte. Womit dä Unfall si verhängnivolle Lauf gno hett, bis s Problem vo herbi gruefne Experte nach rund 2,5 Stunde erkennt worde isch und me d Notchüelig no het chönne aschalte.

Dr anderi Block Nr. 1 isch nachhär einigi Johr schtill gschtande, ä konsultativi Volksabschtimmig het sogar entschide, ne nümm in Betrieb z nää. Trotzdäm hei nem die verantwortleche Behörde denn i de 1980er Johr än Erlaubnis zum Wiiterbetrieb gäh, är produziert au hütt no Schtrom.

Weblinks ändere

  Commons: Uufall im Kernkraftwerk Three Mile Island – Sammlig vo Multimediadateie