Choolestoffdioxid
Choolestoffdioxid oder Chooledioxid isch e chemischi Verbindig us Choolestoff und Suurstoff mit dr Summeformle CO2. Wenn s in Wasser glööst isch säit men em vilmol – bsundrigs im Zämmehang mit chooledioxidhaltige Getränk – Cholesüüri, was ungnau isch.
Choolestoffdioxid isch e unbrennbars, suurs, farb- und gruchloses Gas, wo guet in Wasser lööslig isch. Mit basische Metalloxid oder -hüdroxid bildet es zwei Arte vo Salz, wo men e Carbonat und Hydrocarbonat säit.
Choolestoffdioxid isch e natürlige Bestanddäil vo dr Luft. Im Joor 2013 het s e middleri Konzentrazion vo 0,040 Volumebrozänt (400 ppm) ghaa.[1] Die Konzentrazioon isch sit em Aafang vo dr Industrielle Revoluzioon gwaggse und wil s Chooledioxid e wichdigs Driibhuusgaas isch, warne Klimaforscher vor ere Klimakatastroofe.
S Choolestoffdioxid entstoot, wenn choolestoffhaltigi Substanz vollständig verbrennt wärde. Im Organismus vo Lääbewääse isch s e Brodukt vo dr Zällatmig. Pflanze, Alge sowie mönggi Bakterie und Archaeä wandle Choolestoffdioxid dur Fixierig in Biomasse um. Bi dr Fotosünthese entstoot us anorganischem Choolestoffdioxid und Wasser Glucose. Choolestoffdioxid isch e wichdige Bestanddäil vom globale Choolestoffzüklus. Es cha toxischischi Uswirkige ha, aber d Konzentrazioon in dr Luft länge nid für daas und au nid wemm mä Glüürliwasser drinkt.
Chooledioxid wird technisch vil aagwändet. In dr chemische Industrii wird s zum Bischbil brucht zum Harnstoff broduziere. Gfroore wirds as Froocheniis als Chüelmittel verwändet, überkritischs Choolestoffdioxid wird as Lösigs- und Extraktionsmiddel iigsetzt.
Litratuur
ändere- Hans-Otto Pörtner: Auswirkungen von CO2-Eintrag und Temperaturerhöhung auf die marine Biosphäre. (PDF; 1,3 MB)
- Jens Soentgen, Armin Reller: CO2 – Lebenselixier und Klimakiller. Oekom-Verlag, München 2009, ISBN 978-3-86581-118-9.
- James Newton Butler: Carbon Dioxide Equilibria and Their Applications. Lewis Publishers, 1991, ISBN 0-87371-624-8.
- Martin M. Halmann, Meyer Steinberg: Greenhouse Gas Carbon Dioxide Mitigation: Science and Technology. CRC Press Inc, 1998, ISBN 1-56670-284-4.
- Martin M. Halmann: Chemical Fixation of Carbon Dioxide Methods Recycling: Methods of Recycling CO2 into Useful Products. CRC Press Inc, 1993, ISBN 0-8493-4428-X.
Weblingg
ändere
Commons: Choolestoffdioxid – Sammlig vo Multimediadateie- Umweltbundesamt – Deutsche Emissionshandelsstelle (DEHSt)
- Carbon Dioxide Information Analysis Center des U.S. Department of Energy
- Carbon Monitoring for Action (CARMA) – Datenbank mit Informationen zu den Kohlenstoffdioxidemissionen von über 50.000 Kraftwerken und 4.000 Energieunternehmen weltweit
Fuessnoote
ändere- ↑ Brian Clark Howard: Northern Hemisphere Cracks 400 ppm CO₂ for Whole Month for First Time. In: National Geographic. 27. Mai 2014, abgruefen am 30. Juni 2014.